اسلام آباد۔ 17 نومبر (اے پی پی) وزیر خارجہ شاہ محمود قریشی پارینے کہ گچین کاری کانود اٹ ترمیم و الیکٹرک ووٹنگ مشین (ای وی ایم) درستی راستی کرفسا نن مستین نا مون انگا ٹک آتے سفا کننگ خوانہ، 1970ء آن پد اخس کہ گچین کاری مس اوفتیا سوج مس، وخت بسنے کہ نن تینا سمت ءِ سہی کین و ہندن ءُ کانود سازی اس کین کہ ہمیشہ کن آجو ، شفاف و پت انا قابل گچین کاری نظام اس رواج مرے، حکومت نا صف آتے ٹی یکجہتی و سیوتیک سلوک ءُ ، کانود سازی کن غٹ وڑوڈول ءِ اختیار کننگانے، ای وی ایم مشین ہمو ناپاک ارادہ غاتے دفن کننگ کن اتنگ انگ ءِ ہرافتے مستین اٹ مسلط کننگاکہ، آجو، شفاف و پت انا قابل گچین کاری نظام اس تینا کننگ والا اُن، قائد حزب اختلاف دوآبہ ءِ تینا کپ، سمندر پار پاکستانی تا ڈالر اوفتے قبول ءِ، اوفتے وونٹ انا حق منظور اف، گچین کاری تے دُزی مننگ آن بچفنگ کن غٹ باسک آک گچین کاری کانود اٹ ترمیم نا حق اٹ وونٹ ایتر۔ چارشنبے نادے آ پارلیمنٹ نا اسیجائی دیوان اٹی گپ وتران کرسا اوپارے کہ دا ایوان ہندن ءُ کانود سازی اس جوڑ کننگ والا ءِ ہراڑآن مستین نا خرابی و قباحت آک چٹرہ و شفاف گچین کاری نظام ملک اٹ رائج مریک۔ اوپارے کہ حکومت مون ءُ کانود اس مسلط کننگ خواپک بلکن نن مستین نا مون انگا ٹک آتے ساف کننگ خوانہ۔ اینو اسہ تاریخی ءُ دے اسے ، 1970آن پد اخس کہ گچین کاری مس اوفتیان سوج کننگا۔ وخت بسنے کہ نن تینا سمت ءِ سہی کین و ہندن ءُ کانود سازی اس کین کہ ہمیشہ کن آجو، شفاف و پت انا قابل گچین کاری نظام اس رائج مرے۔ شاہ محمود قریشی پارے کہ حکومت ای وی ایم نا باندات آ اپوزیشن تون مہالو ہم رابطہ کرے ولے اپوزیشن ہچ چکار کتو۔ اسیجائی دیوان ءِ عجلت اٹ بٹنگ انگتنے، ننتون عددی گیشتری متوکہ تو دا دیوان ءِ انت اکن بٹنگانہ، حکومت نا صفت آتے ٹی یکجہتی ءِ و سیوتی تفوک ءُ۔ کانود سازی کن اسہ مروجہ وڑوڈول اسے ہرادے نن اختیار کرینن۔ گڑاس باسک آک تشنگی ءِ مُر کننگ کن وخت خواہسوسر نن اوفتے دلیل آتے اٹ قائل کرینن و او قائل مرسا اینو ننا صف آتیٹی تولوک ءُ۔ ای وی ایم مشین ہموناپاک ارادہ غاتے دفن کننگ کن اتنگ انگ ءِ ہرافتے مستین اٹ قوم آ مسلط کننگاکہ۔ شفاف گچین کاری نظام کن پوسکن آ ٹیکنالوجی نا سیبو ءِ ہلنگ انگ ءِ۔
