کوئٹہ۔ 16 نومبر (اے پی پی) صدر مملکت ڈاکٹرعارف علوی پارینے کہ اسلامی فلاحی ریاست اولی دے آن پی ٹی آئی نا منشور نا بشخ اسے، نیزگار و پدسلوک تپہ غاتے کن بناکروک آ احساس پروگرام نا رداٹ حقدار خاہوت آتے فی اُرا 12 ہزار روپئی بشخنگانے، داٹی بلوچستان آن تعلق تخوک آ 3 لکھ 38 ہزار نیزگار خاہوت ہم اوار ءُ، زالبول آتے زرگزرانی اعتبار اٹ سوگو کروئی مریک تانکہ او ملکی شونداری نا عمل اٹ براہ راست تینا کڑد ءِ ادا کننگ کیر۔ صدر مملکت داخیال آتا درشانی ءِ کوئٹہ ٹی احساس کفالت کیش و احساس انڈر گریجویٹ اسکالرشپ سرٹیفکیٹ آتا بشخنگ نا بابت اڈ ہلوک آ دود آن تران کرسا کرے۔ صدر مملکت ڈاکٹر عارف علوی پارے کہ کورونا دین انا جہانی دین اٹی وزیراعظم عمران خان راج انا نزور تپہ غاتا مشکل آتے مون آ تخسا پورو لاک ڈاؤن نا مخالفت ءِ کرے و دا فیصلہ غان غریب و مزور تپہ غاتے مالی وڑاٹ مشکل آتیان بچفے۔ اوپارے کہ لاک ڈاؤن اٹی احساس پروگرام نا رداٹ 12 کروڑ خاہوت آتے ٹی 200 ارب روپئی بشخنگا۔ صدر مملکت پارے کہ حکومت نا مثبت گام گیج آتا سوب آن ملکی زرگزران اٹ گچینی بننگ ءِ و گرج داہیت انا ءِ کہ اختہ مروک آ تپہ غاتے بڑز اتنگ کن گام گیج کننگے۔ اوپارے کہ زالبول آتے احساس کیش پروگرام نا رداٹ زرتس بینک اکاؤنٹ نا کمک اٹ کننگ کن کوشست کننگ انگ ءِ۔ اوپارے کہ زالبول آتے زرگزرانی اعتبار اٹ سوگو کروئی مریک تانکہ او ملکی شونداری نا عمل اٹ براہ راست تینا کڑد ءِ ادا کننگ کیر۔ انفارمیشن ٹیکنالوجی نا بابت صدر مملکت نا پاننگ ئس کہ پاکستان نا شونداری نا دارومدار آئی ٹی نا بشخ ءِ مون آ دننگ آٹے۔ طالب علم آتے اسکالرشپ تننگ نا مسخت تعلیم اٹ بریبری اتنگ ءِ دنیا آئی ٹی ٹی بھاز کاریم کرے نن ساڑی حالیت آتے مون آ تخسا آئی ٹی نا بشخ آتیا چکار کرفوئی مریک۔ اویونیورسٹی تا وائس چانسلر آتیا زور شاغسا پارے کہ او انفارمیشن ٹیکنالوجی نا بابت سلیبس ءِ پوسکن آ دورہ انا خواست و مارکیٹ نا گرج آتا رداٹ جوڑ کیر۔ تانکہ ننا گریجویٹس ہم مون آ ہنسا آئی ٹی نا بشخ اٹ تینا کڑد ادا کیر۔ صدر مملکت پارے کہ خصوصی بندغ آک راج انا اہم ءُ بشخ اسے ءُ و اوفتے کسبکار جوڑ کننگ کن گام گیج آتا گرج ءِ ہراڑآن خصوصی بندغ آک تینا کٹیانا بست وبند ءِ کننگ کیرہ۔ صدر پارے کہ سرسہب ورناپروگرام نا کمک اٹ زالبول آک ہم وام تا آسراتی آن فائدہ ہرفنگ کیرہ۔ دود آن گورنر بلوچستان سید ظہور احمد آغا و ڈائریکٹر جنرل بی آئی ایس پی بلوچستان عبدالجبار ئسک ہم تران کریر۔ داکان مست صدر مملکت طالب علم آتے ٹی احساس انڈرگریجویٹ اسکالرشپ سرٹیفکیٹ و حقدار زالبول آتے ٹی احساس کفالت پروگرام نا رداٹ نغد زر بشخا۔
