کوئٹہ۔ 16 نومبر (اے پی پی) خاتون اول بیگم ثمینہ عارف علوی پارینے کہ پاکستان اٹ ہرسال اسہ لکھ زالبول سینہ نا کینسر اٹ اختہ مننگ ءُ و ہرہشت زالبول آن اسہ زالبول داموذی مرض انا گواچی ءِ، راج اٹ بریسٹ کینسر نا بابت آگاہی المی ءِ، وخت آ تشخیص آن بریسٹ کینسر نا درمان مننگ کیک۔ داخیال آتا درشانی ءِ او سے شنبے نادے آ داڑے سردار بہادر خان ویمن یونیورسٹی ٹی بریسٹ کینسر، واکدار زالبول و خصوصی بندغ آتا ویل آتا بابت آگاہی نا بارواٹ سیمینار آن بحیثیت مہمان خاص تران کرسا کرے۔ داوخت آ یونیورسٹی نا وائس چانسلر پروفیسر ڈاکٹر ناہید حق خاتون اول بیگم ثمینہ علوی ءِ جامعہ سردار بہادر خان آ بننگ آ ببوخیرٹ پارے و یونیورسٹی ٹی خوان و خوانفنگ، بریسٹ کینسر نا بارواٹ آگاہی نا بابت گام گیج و جامعہ نا جم کارکڑد ءِ مون آ تخا۔ ڈاکٹر ثمینہ عارف علوی پارے کہ پاکستان اٹ بریسٹ نا ودوک آ کیس آک تشویشناک ءُ، بریسٹ کینسر اسہ چپ ءُ خونی اسے ہرا وخت آ تشخیص مفننگ آن ترندی اٹ جان لیوا جوڑ مریک، پاکستان اٹ ہر 8 آن اسہ زالبول بریسٹ کینسر نا گواچی ءِ۔ اوپارے کہ راجی قدر انا سوب آن زالبول آتا گیشتری سینہ نا کینسر نا بابت خاہوت تون ہیت کننگ کپسہ، سینہ نا کینسر ناکیس آتے ٹی داہیت مون آ بسنے کہ بیرہ 40 سال آن زیات آخا بلکن کم وئی مسنک ہم بریسٹ کینسر نا گواچی مننگءُ۔ اونا پاننگ ئس کہ پنک ربن تحریک نا مسخت بیرہ اسہ خاص ءُ دے اس اڈتننگ اف بلکن آگاہی نا مون آ دننگ و تسلسل مرے، نن کس اسے خوفزدہ کپن بیرہ آگاہی ءِ مون آ دننگ ناءِ۔ خاتون اول بیگم ثمینہ عارف علوی سیمینار اٹ معذور زالبول آتا شریداری نا ستاءِ کرسا پارے کہ راج انا خصوصی بندغ آتے روزگار و شونداری نا اسہ وڑ وارخواہی فراوان کننگ ننا غٹ انا اخلاقی و معاشرتی فرض ءِ۔ سرکاری ملازمت آتے ٹی معذور کوٹہ غا عملدرآمد کن بنجائی و صوبائی حکومت آتے گچین گام گیج آتون اوار اوار کسبی کسبکاری نا تربیت کن ہم کاریم کروئی مریک، پاکستان نا زالبول آک اینو ہم میرات، شخصیت و راجی فیصلہ سازی کن جہد کننگ ءُ۔ اوپارے کہ حکومت زالبول آتے زرگزرانی و اقتصادی وڑاٹ واکدار کننگ کن سنجیدہ گام گیج آتیا عملدرآمد کننگ ءِ و اوفتے کاروبار کن کم مارک اپ آ وام تننگ انگ ءِ ، ننا زالبول آک کس اسے آن کم افس نئے نزور ءُ، ملک انا زرگزران اٹ زالبول آتا اہم ءُ کڑد اسے و معاشرتی فیصلہ سازی و غٹ زند انا بشخ آتے ٹی اوفتا گچین نمائندگی شونداری نا نشانی ءِ۔ اوپارے کہ جان جوڑ زالبول جان جوڑ راج اس ودی کیک، پاکستان اٹ کینسر نا سالانہ اسہ لکھ کیس رپورٹ مننگ گڑتی نا سوب ءِ، میڈیا تون اوار ہرتپہ فکر انا بندغ آتے بریسٹ کینسر نا بابت آگاہی نا بارواٹ تینا کڑد ءِ ادا کروئی مریک۔ اوپارے کہ معذور بندغ آتے کن ننے غٹ ءِ اواری اٹ کاریم کروئی ءِ، غٹ ادارہ غاتے ٹی معذور بندغ آتے کن ریمپ اس بایدے مرے ، مستین اٹ معذور آتے گوجالنگا ولے ساڑی آ وخت خصوصی بندغ آتا راجی آسراتی کن سنجیدہ گام گیج کننگ انگ ءِ۔ داکان مست خصوصی بندغ آتا نمائندہ تنظیم نا سروک شازیہ بتول ، جامعہ نا لیکچرار ڈاکٹر فہمیدہ ، ممبر نیشنل کمیشن آن اسٹیٹس آف ویمن ریحانہ خلجی، زرغونہ ودود، و سینار ہسپتال کوئٹہ نا ہیڈ آف ڈیپارٹمنٹ ڈاکٹر شہلا افتخار ئسک ہم سرحال نا رداٹ تینا خیال آتا درشانی ءِ کریر۔ سیمینار نا ایسر آ سردار بہادر خان ویمن یونیورسٹی نا وائس چانسلر پروفیسر ڈاکٹر ناہید حق خاتون اول بیگم ثمینہ عارف علوی ءِ جامعہ نا سوینئر و روایتی شال اس پیش کرے۔
