اسلام آباد۔ 16 نومبر (اے پی پی) اسپیکر قومی اسمبلی اسد قیصر تون اسلام آباد چیمبر آف کامرس اینڈ انڈسٹری نا صدر محمد شکیل منیر سے شنبے نادے آ اوڑدہی کرے ہراٹی ملک انا جم زرگزرانی حالیت ، پوریاگر برادری و صنعت کار آتے مون تروک ویل آتیا گپ وتران کننگا۔ اسپیکر قومی اسمبلی گپ وتران کرسا پارے کہ پوریاگر برادری ملک انا اقتصادی شونداری کن تمبہ نا حیثیت تخک۔ پوریاگرآتے مون تروک ویل آتا ایسری کن ہرممکن گام گیج کننگ انگ ءِ۔ پوریاگر و صنعت کار برادری ملک انا اقتصادی شونداری و زرکاری نا مون آ دننگ کن تینا کڑد ادا کیر۔ اوغانستان و نیامی ایشیائی ریاست و ایلو ہمسایہ ملک آتا نیام اٹ واپار نامون آ دننگ ڈیہہ نا شونہالی کن بھاز اہمیت تخک۔ قومی اسمبلی ٹی پاک۔ اوغان پارلیمانی فرینڈ شپ پڑک نا ایگزیکٹیو کمیٹی ہڑتوم آ ملک آتے ٹی واپار نا مون آ دننگ کن کاریم کننگ ءُ۔ اوپارے کہ علاقائی واپار اٹ ودکی کن دا ملک آتا تعلقدار ایوان ہائے صنعت و واپار اٹ رابطہ غاتے ٹی ودکی المی ءِ۔ پاکستان و اوغانستان اٹ واپار نا مون آ دننگ کن ہڑتوم آ ملک آتا پوریاگر برادری و زرکار آتا اسیجائی کانفرنس اس اڈتننگے۔ صدر اسلام آباد چیمبر آف کامرس محمد شکیل منیر اسپیکر قومی اسمبلی ءِ پوریاگر برادری ءِ مون تروک ویل آتیان معلومدار کرے و پارے کہ اسلام آباد اٹی پوسکن آ انڈسٹریل اسٹیٹ نا جوڑ کننگ المی ءِ۔ حکومت پوسکن آ انڈسٹریل اسٹیٹ نا جوڑ کننگ کن گام گیج کے۔ ساڑی حکومت نا زرکار دوست پالیسی ستاکڑزک۔ صدر چیمبر آف کامرس اسپیکر قومی اسمبلی ءِ ایوان ہائے صنعت و واپار اسلام آباد نا دورہ ءِ کننگ نا سلہ خلک و اوصدر چیمبرپاک۔ اوغان واپار اٹ ودکی کن اسپیکر قومی اسمبلی اسد قیصر نا کڑد انا ستاءِ کرے۔ داوخت آ اسپیکر قومی اسمبلی صدر اسلام آباد چیمبر آف کامرس ءِ پوریاگر برادری ءِ مون تروک ویل آتا ایسری کن تینا ہرممکن کمکاری نا باوری کرفے۔
