اسلام آباد۔ 16 نومبر (اے پی پی) بنجائی وزیر حوالکاری وشینکاری چوہدری فواد حسین پارینے کہ ن لیگ عدلیہ نا برخلاف مہم نا بناءِ کرینے، نواز شریف یا مریم نواز نا پیشی آن مست داوڑنا سازش مدام کرسا کننگانے، ن لیگ دروہم عدلیہ غا جلہو کرے، اسہ ہندن ءُ بندغ اسے نا کنڈآن جعلی بیان اس مون آاتنگا ہرا ن لیگ نا لیڈرآتا پروردہ ءِ، گچین کاری اصلاحات پی ٹی آئی و عمران خان نا ذاتی آخا، قومی ایجنڈا ءِ، ہر گچین کاری ٹی نن اصلاحات نا خواست کینہ، ہراتم اصلاحات نا کنڈآ کانہ تو اپوزیشن شورکننگ نا بناءِ کیک، پارلیمان نا اسیجائی دیوان ءِ پگہ بٹنگ انگانے، نن دا بل ءِ پارلیمان آن منظور کرفنگ اُن، اپوزیشن گچین کاری اصلاحات آ است انا حب اٹ سجفے۔ داخیال آتا درشانی ءِ او سے شنبے نادے آ الیکشن کمیشن نا پیشن میڈیا تون گپ وتران کرساکرے۔ داوخت آ وزیر مملکت حوالکاری فرخ حبیب ہم ساڑی ئسک۔ چوہدری فواد حسین پارے کہ مستین اٹ نواز شریف ءِ ہراتم سپریم کورٹ بٹنگ انگا تو ن لیگ سپریم کورٹ آ جلہو کریسس، ن لیگ دروہم عدلیہ غا جلہو کرے، اسہ ہندن ءُ بندغ اسے نا کنڈآن جعلی بیان مون آ ایس ہرا ن لیگ نا لیڈر آتا پروردہ ءِ۔ اوپارے کہ ہچ ءُ شک اس اف کہ دا بندغ لندن اٹ نواز شریف نا خڑچہ غا رہینگ انگ ءِ، اونا حلفیہ بیان نا فیس ءِ ہم نواز شریف فیملی تس، حسین نواز داباندات ءِ ڈیل کننگ ءِ۔ اوپارے کہ ہراتم بندغ آتے ادارہ غاتا برخلاف کاریم اٹ اتسا ادارہ غاتا شرف ءِ نسخان تننگ نا کوشست کننگک تو تنکی ودی مریک۔ بنجائی وزیر حوالکاری پارے کہ چیف جسٹس اسلام آباد ہائی کورٹ دا باندات نا نوٹس ہلکونے ہرا جوان ءُ گام اسے، توہین عدالت آ زموارآتے اینو بٹنگ انگانے، دا باندات آ مون آ ہِننگ نا گرج ءِ۔ چوہدری فواد حسین پارے کہ پارلیمان نا اسیجائی دیوان ءِ پگہ بٹنگ انگانے، ای وی ایم و گچین کاری اصلاحات پی ٹی آئی و عمران خان نا ذاتی آخا، قومی ایجنڈا ءِ، ہر گچین کاری ٹی نن اصلاحات نا خواست کینہ، ہراتم اصلاحات نا کنڈآ کانہ تو اپوزیشن شور کننگ نا بناءِ کیک۔ اوپارے کہ اپوزیشن پگہ نا دیوان اٹ ننتون تولے، اصلاحات آ است انا حب اٹ سجفے، اپوزیشن ءِ ہراترمیم درکارءِ اواتے، اوڑآ شرہ کینہ۔ اوپارے کہ اصلاحات المی ءِ، پگہ نن دا بل ءِ پاس کرفنگ اُن، غٹ سیوتیک وزیراعظم نا کماشی آ پورو پت انا درشانی ءِ کرینو، نن است انا حب اٹ مون آ ہِننگ کن تیار اُن۔ بنجائی وزیر حوالکاری پارے کہ گچین کاری، جوڈیشری ، میڈیا و سیاسی نظام اٹ اصلاحات المی مرے، نن اوفتیا اواری اٹ مون آ ہِننگ کن تیار اُن۔ چوہدری فواد حسین پارے کہ بحیثیت وزیر حوالکاری ہراکہ ہیت ءِ کرینٹ، حکومت و کابینہ نا پالیسی نا رداٹ کرینٹ، انفرادی حیثیت اٹ الیکشن کمیشن و ادارہ غاتا شرف ءِ کیوہ، کنے اومیت ءِ کہ الیکشن کمیشن داموقف ءِ گچین وڑاٹ ہلیک۔
