اسلام آباد۔ 16 نومبر (اے پی پی) وزیر مملکت پارلیمانی امور علی محمد خان پارینے کہ حکومت الس ءِ کبینی نا اثرآتیان بچفنگ کن 120 ارب روپئی نا پیکج اس تسنے، کبینی نا ویل ساڑی ءِ ولے نیزگاری نا کچ اٹی کمتی بسنے۔ سے شنبے نادے آ بڑزکو ایوان نا دیوان اٹی وقفہ سوج آتے ٹی سینیٹر افنان و ایلوباسک آتا سوج آتا ورندی ٹی اوپارے کہ حکومت نُت، سی و دال آتا ہلنگ آ سبسڈی کن 120 ارب روپئی نا پیکج اس تننگ ءِ، داکان بیدس 1600 ارب روپئی نا سرسہہب پاکستان پروگرام نا ہم بناءِ کننگانے ہرانا وزیراعظم بناءِ کرینے، داپروگرام نا رداٹ بے سود آن وام تننگک ہراڑآن مخلوق تینا کاروبار اس بناکننگ کیک، داکان مست ملک اٹ بے سود وام تننگ نا تصور الوکہ۔ اوپارے کہ سرسہب ورناپروگرام و ایلو حکومتی گام گیج آتیان لس بندغ ءِ فائدہ مریک، ملک اٹی نیزگاری نا کچ اٹی کمتی بسنے و داٹی پین 2 درسد کمتی نا گمان ءِ۔
