اسلام آباد۔ 16 نومبر (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ پاکستان ٹورازم ڈویلپمنٹ کارپوریشن (پی ٹی ڈی سی) نا ملکیت آتے ہرچار آ صوبہ، آزاد جموں و کشمیر و گلگت بلتستان نا حوالہ کننگ انگ ءِ ، ملازم آتون ہچ ءُ امتیازی سلوک اس مفک۔ سے شنبے نادے آ بڑزکو ایوان نا دیوان اٹی سینیٹر محسن عزیز نا چکاری نوٹس نا ورندی ٹی سلاہکار پارلیمانی امور پارے کہ پی ٹی ڈی سی نا جائیداد بنجائی دارالحکومت، ہرچار آصوبہ، گلگت بلتستان و آزادکشمیر اٹی ساڑی ءُ، بنجائی کابینہ ساڑی آ دیوان اٹی پی ٹی ڈی سی نا ملکیت آتے صوبہ غاتا حوالہ کننگ نا فیصلہ کرینے، بنجائی دارالحکومت اٹی پی ٹی ڈی سی نا ملکیت آک اسلام آباد انتظامیہ تون مریرہ و داڑے اسہ پوسکن ءُ سیل و سواتی ہند اس ہم جوڑ کننگک، ملازم آتون ہچ وڑنا امتیازی سلوک اس مفک۔ اوپارے کہ گلگت بلتستان و آزاد کشمیر نا حکومت آتون طے مسنے کہ پی ٹی ڈی سی نا ملکیت آتے سرکاری و نجی شریداری اٹ تننگک و اوفتیان دوئی مروک 50 درسد کٹیا سیل و سواتی سرجزآتیا خڑچ مریک۔
