بلوچستان آن احساس محرومی و پسماندگی تا چٹفنگ ننا اولیت ءِ، صوبہ ءِ ودکی فنڈ فراوان کننگ کن سنبرینگوک اُن، صدر ڈاکٹر عارف علوی نا گورنر ہاؤس کوئٹہ ٹی خصوصی بندغ آتا بحالی نا بابت دیوان آن تران

کوئٹہ۔ 15 نومبر (اے پی پی) صدر مملکت ڈاکٹر عارف علوی پارینے کہ بلوچستان آن احساس محرومی و پسماندگی تا چٹفنگ ننا اولیت ءِ، این ایف سی ایوارڈ نا رداٹ وسیلہ غاتا بشخنگ آبادی نا بنداو آ مریک ولے نن بلوچستان ءِ ودکی فنڈز فراوان کننگ کن سنبرینگوک اُن۔ داخیال آتا درشانی ءِ او دوشنبے نادے آ داڑے گورنر ہاؤس کوئٹہ ٹی خصوصی بندغ آتا بحالی نا بابت دیوان نا کماشی ءِ کرسا کرے۔ صدر مملکت پارے کہ معذور بندغ آتے راج انا فائدہ ئی و کاریمی شاری جوڑ کننگ المی ءِ۔ دامسخت کن ووکیشنل ٹریننگ سینٹر آتا دنگ ءِ ودفوئی مریک۔ صدر ڈاکٹر عارف علوی پارے کہ معذور بندغ آک راج انا اہم ءُ بشخ اسے ءُ۔ اوفتے کسبکار کننگ نا گرج ءِ تانکہ او عزتی ءُ روزگار اس کننگ کیر و ملک انا شونداری ٹی تینا کڑد ءِ ادا کننگ کیر۔ داوخت آ خاتون اول بیگم ثمینہ عارف علوی، گورنر بلوچستان سید ظہور آغا، وزیراعلیٰ میر عبدالقدوس بزنجو، چیف سیکرٹری مطہر نیاز رانا و جہانی ادارہ جان جوڑی نا نمائندہ مریم ملک ئسک ہم ساڑی ئسر۔ دیوان اٹی سوشل ویلفیئر ڈیپارٹمنٹ نا کاریم نا کچ ءِ ودفنگ نا بابت امور آتیا ہم سجفنگا۔