اسلام آباد۔ 15 نومبر (اے پی پی) صدر مملکت ڈاکٹر عارف علوی پارینے کہ حکومت بلوچستان نا شونداری کن خصوصی گام گیج کننگ ءِ، بلوچستان کن خصوصی شونداری پیکج آن صوبہ ٹی شونہالی بریک، خصوصی بندغ و بلوچستان نا ورناتے حکومت نا وام اسکیم نا بارواٹ راہشونی فراوان کننگے۔ دوشنبے نادے آ ایوان صدر نا میڈیا ونگ آن جاری بیان نا رداٹ داخیال آتا درشانی ءِ او گورنر ہاؤس کوئٹہ ٹی خصوصی بندغ آتا راجی آسراتی نا بابت گام گیج آتیا حوال اٹی کرے۔ دیوان اٹی گورنر بلوچستان سید ظہور آغا، وزیراعلیٰ میر عبدالقدوس بزنجو و ایلو کمامدارآک ساڑی ئسر۔ صدر مملکت پارے کہ خصوصی بندغ آتے راج انا فائدہ ئی و کاریمی شاری جوڑ کننگ المی ءِ، خصوصی بندغ آتے کسبکار جوڑ کننگ کن ووکیشنل ٹریننگ سینٹر آتا دنگ ءِ ودفوئی مریک، خصوصی بندغ آک راج انا اہم ءُ بشخ اسے ءُ، ہرافتے کسبکار جوڑ کننگ نا گرج ءِ۔ ڈاکٹر عارف علوی پارے کہ بلوچستان نا شونداری آن مچ آ ملک اٹی شونہالی بریک، شونداری پیکج آن صوبہ نا محرومی تا ازالہ ءِ کننگ اٹ کمک رسینگک، بلوچستان نا شونداری کن خصوصی شونداری پیکج آن صوبہ ٹی شونہالی بریک۔ اوپارے کہ بلوچستان نا ورناک حکومت نا کنڈآن کاروباری وام انا اسکیم تیان فائدہ ہرفر۔ صدر مملکت پارت کرے کہ خصوصی بندغ و بلوچستان نا ورناتے حکومت نا وام اسکیم تا بارواٹ راہشونی فراوان کننگے۔
