حضرو۔ 15 نومبر (اے پی پی) 12 کلومیٹر مرغن بھٹیوٹ بوٹا سڑک نا تفنگ نا بناءِ کننگانے ہراڑآن اٹک و تحصیل جنڈ انا ہفت خلق آتا ہزار آ رہینگوک آتے براہ راست فائدہ ملک ہرافتے ٹی بھٹیوٹ ، ڈھوک رتی کسی، چونترہ ، سلمان آباد، مہورہ، کھنڈہ ، ڈھوک کالا و ایلوفک اوار ءُ۔ داہیت ءِ وزیراعظم نا خصوصی کمکار موسمیاتی بدلی ملک امین اسلم میڈیا تون گپ وتران کرسا پارے۔ اوپارے کہ مفاد عامہ نا دا سٹرک ہراکہ ڈیڈپروجیکٹ اس جوڑ مسوسس وزیراعظم عمران خان نا پسماندہ علاقہ غاتیا خاص چکار تننگ نا سوب آن بناکننگانے و داڑآن نئے بیرہ گچین سفری آسراتی دُوبریک بلکن دا خلق آتا اٹک آن فاصلہ ہم کم مریک داوخت آ داخلق انا رہینگوک آک اٹک آ سرمننگ کن 80 آن 100 کلومیٹر نا فاصلہ طے کیرہ ولے دا سڑک نا پوروی آن پد دا فاصلہ 50 درسد اسکان کم مریک۔ دا سڑک آن جنڈ و پنڈی گھیب انا ایلو علاقہ غاتے ہم فائدہ مریک و داسڑک آن زرگزرانی سرجزآتے ٹی ہم کمک ملک انتئے کہ دا وخت آ داکسر مشی آ علاقہ مننگ نا سوب آن غیر آباد ءِ سڑک نا تفنگ آن ایب وکیب اٹ الس ترندی اٹ آباد مریک۔ اٹک نا السی راجی حلقہ غاک وزیراعظم عمران خان نا دابابت منت واری ءِ ہرفینو کہ دا سڑک نا تفنگ آن این اے 55 و 56 ہڑتوم آ حلقہ غاتا الس فائدہ ہرفنگ کیک۔
