اسلام آباد۔ 12 نومبر (اے پی پی) بنجائی وزیر توانائی حماد اظہر پارینے کہ ملک اٹی گیس انا کوڑی ترندی اٹ کم مننگ ءُ، 2019 ء ٹی گیس انا نہادآتے ودفنگتو، ایل این جی نا ہلنگ نا غٹ آن اڑزآن معاہدہ ءِ ساڑی حکومت کرینے، پوسکن آانرجی ٹرمینل ٹیک آرپے نا بنداو آ خلنگ پننگک۔ یخ انا موسم اٹی ہڑدے ئی ناشتہ ، پیشیم و شام انا اِرغ کُننگ نا وخت آ اُرائی صارف آتے گیس انا فراوانی ءِ ہرحال اٹ پک کننگک۔ جمعہ نادے آ بڑزکو ایوان اٹ سینیٹر شیری رحمان و سینیٹر سلیم مانڈوی والا نا چکاری نوٹس نا ورندی ٹی اوپارے کہ 70 درسد گیس ملک آن پیش تمک، 30 درسد گیس درآمد کروئی تمک، این این جی بھاز کبین ءِ و اونا مقابلہ ٹی سسٹم گیس اڑزآن ءِ، سندھ آن 38 درسد، بلوچستان آن 40 درسد، خیبرپختونخواآن 12 درسد و پنجاب آن 8 درسد گیس پیش تمک۔ سسٹم گیس انا ریٹ غٹ صوبہ غاتے ٹی اسہ وڑ ءِ ، 20 درسد ایل این جی نا ہلنگ نا معاہدہ چار تُو مست کننگک، (ن) لیگ ایل این جی نا معاہدہ 13.4 درسد برینٹ آ کریسس، ننا حکومت دا معاہدہ ءِ 10.2 درسد برینٹ آ اڑزآن کرینے، ہفتہ ٹی مسہ دے گیس انا فراوانی نا بابت خبرآک راست افس، ہڑدے ئی ناشتہ، پیشیم نا اِرغ و نن نا اِرغ نا وخت آ اُرائی صارف آتے گیس انا فراوانی ءِ پک کننگک، پاک ایران گیس پائپ لائن ڈٹ آ ایران آ پابندی تا سوب آن پیش رفت مفننگ ءِ، نارتھ ساؤتھ گیس پائپ لائن نا ڈٹ آ پیش رفت کن روس اتون مذاکرات برجاءِ۔ اوپارے کہ (ن) لیگ انا دور اٹی ٹیک آرپے نا بنداو آ ایل این جی نا اِرا ٹرمینل خلنگاسس ہرافتا سوب آن ننے 8 کروڑ روپئی ہڑدے ئی ادا کروئی تمک، داسہ اِرا پوسکن ءُ ٹرمینل خلنگ انگ ءِ، مٹسوبشی و اسہ لوکل کنسور شیم قطر گیس اتون اواری اٹ دا ایل این جی ٹرمینل اس خلیرہ ولے اوفتے کن ننے ہچ ءُ کِرا اس تروئی تمپک، ایل این جی نا ہلنگ کن باقاعدہ اوپن ٹینڈر مریک و مسابقتی بولی نا کمک اٹ معاہدہ کننگک۔ اوپارے کہ داوخت آ ملک اٹی گیس انا نیٹ ورک بھاز زیات تالان مسنے، 2010ء ٹی ایس این جی پی ایل ہڑدے ئی اِراہزار ایم ایم سی ایف ڈی گیس فراوان کریکہ، داسہ دا 800 ایم ایم سی ایف ڈی آ بسنے۔ اوپارے کہ گیس انا پیدوار غٹ آن زیات سندھ اٹی کم مننگ ءِ۔
