اسلام آباد۔ 12 نومبر (اے پی پی) وزارت قومی غذائی رکھ و پٹ وپول نا کنڈآن قومی اسمبلی ءِ پاننگانے کہ وزیراعظم نا پروگرام نا رداٹ 2019ء آن 2024 ء اسکان کن دہ ارب روپئی آن زیات نا خڑچ آن قومی کشاری ایمرجنسی پروگرام نا بناءِ کننگانے ہرانا رداٹ ملک اٹی تیل دار اجناس نا دسنگ اٹ ودکی کننگک و داڑآن ننا کنوئی آ تیل انا درآمدی بل بھلو حداسسکان کم مریک ۔ جمعہ نادے آ قومی اسمبلی ٹی وقفہ سوج آتے ٹی ریاض الحق نا سوج انا ورندی ٹی پارلیمانی سیکرٹری قومی غذائی رکھ چوہدری امیر سلطان پارے کہ تیل دار اجناس نا بیرہ دہ درسد پاکستان اٹ ودی مریک۔ 2019ء آن 2024ء کن وزیراعظم نا پروگرام نا رداٹ قومی کشاری ایمرجنسی پروگرام 10 آن زیات خڑچ آن بناکننگا، داپروگرام آن ننا درآمدی تیل دار بج آتے ٹی سیبو کم مریک۔ ڈاکٹر نفیسہ شاہ انا سوج انا ورندی ٹی پارلیمانی سیکرٹری چوہدری امیر سلطان پارے کہ تیل دار اجناس نا امپورٹ بل 2.75 ارب ڈالر نا ءِ۔ نن کینولا و زیتون نا بچ دسنگ اُن۔ داڈٹ صوبہ غاتا کمک اٹ بناکننگانے۔ مسہ صوبہ غاک آمادگی ظاہر کرینو ، سندھ انا کنڈآن آمادگی نا انتظار ءِ۔ دا ڈٹ آ عملدرآمد آن ننا تیل دار اجناس نا امپورٹ بل اٹ پیدوار کمتی بریک۔
