فیصل آباد۔ 12 نومبر (اے پی پی) وزیر مملکت حوالکاری و شینکاری فرخ حبیب پارینے کہ حکومت مشکل حالیت آتیان پد ہم الس ءِ غٹ ممکن ریلیف فراوان کننگ ءِ ولے دُن تو کورونا نا جہانی حالیت آتا سوب مچ آ دنیا نا اکانومی زہمی و تدوک آ 50 سالہ تاریخ نا جہانی بدترین کبینی نا ریسہ نا غٹ ءِ مون تروک ءِ ، ہنداخاطرآن اپوزیشن نا کنڈآن حکومت ءِ دانا زموار گودنگ و کبینی نا آڑ اٹ لانگ مارچ نا پڑو ءِ کرسا ملک ءِ انارکی نا گواچی کننگ و ہڑدڑ تالان کننگ نا کوشست کننگ ہچ ءُ حالیت اسے ٹی سہی ءُ گام اس اف، ولے پی ڈی ایم لانگ مارچ کے یا کوئیک مارچ حکومت ءِ داڑآن ہچ ءُ پرخ اس تمپک و حکومت تینا کاریم ءِ برجاتخنگ تون اوار تینا آئینی مد ءِ پورو کیک۔ جمعہ نادے آ پیشیم آ جی سی یونیورسٹی نیو کیمپس فیصل آباد اٹی اڈہلوک اسہ دود اسے ٹی بشخ ہلنگ نا وخت آ میڈیا تون گپ وتران اٹی اوپارے کہ پی ڈی ایم چوں چوں نا مربہ اسے ہرانا بیانیہ اسہ دے پین و ایلو دے پین مریک و اقتدار نا ہوس اٹ اختہ دا ٹولہ اقتدار آن بیدس ماہی بے آب آنبار تڑپنگ ءِ ولے اونا پڑو کروک لانگ مارچ نا حشر ہم اوفتا تدوک آ مارچ و استیفہ غاتا پڑوتیانبار مریک و اوفتے ملک اٹ نزوری اتنگ نا سازش اٹ بھاز بے وڑ بے سہبی مریک۔
