9تُو آن 15 سال اسکان نا چناتے رکھی ٹیکہ خلنگ نامہم 15 نومبر آن بناکننگ ءِ، وزیراعظم نا خصوصی کمکار جان جوڑی ڈاکٹر فیصل سلطان

اسلام آباد۔ 12 نومبر (اے پی پی) وزیراعظم نا خصوصی کمکارجان جوڑی ڈاکٹر فیصل سلطان سورُک و روبیلا غان بچفنگ نا قومی مہم نا بناءِ کرینے، دنیا نا غٹ آن بھلا مہم اٹی 9 تُو آن 15 سال اسکان نا چناتے رکھی ٹیکہ خلنگک، مہم نا باقاعدہ بنامچ آ ملک اٹی 15 نومبر آن مننگ ءِ، مہم اٹی پنچ سال اسکان نا چناتے پولیو آن بچفنگ نا رکھی پڑی ہم کنفنگک، مہم 27 نومبر اسکان برجاسلک۔ اِراہفتہ اسکان برجاسلوک آ مہم اٹی محکمہ جان جوڑی نا 386000کارندہ بشخ ہلنگ ءُ، ہرافتے ٹی 76 ویکسین سینٹرز، و اسہ لکھ 43 ہزار سوشل موبلائزر اوار ءُ۔ قومی مہم نا باقاعدہ بناءِ کرسا وزیراعظم نا خصوصی کمکار جان جوڑی ڈاکٹر فیصل سلطان پارے کہ سورُک و روبیلامتعدی ناجوڑی ءُ۔ و چناتیکن بھاز پیچیدگی داتسکان کہ مرک ہم مننگ کیک۔ سورُک و روبیلا نا برخلاف موثر ویکسین ساڑی ءِ۔ وزیراعظم نا کمکار جان جوڑی ڈاکٹر فیصل سلطان پارے کہ ای جان جوڑی نا کارندہ غاتیان خواست کیوہ کہ او لگن اٹ کاریم کیر و لمہ و باوہ تینا چناتے سورُک روبیلا نا رکھی ٹیکہ خلسا تینا مخ تفی نا درشانی ءِ کیر،و چناتا جان جوڑی نا رکھ ءِ پک کیر۔ رکھی ٹیکہ جات پروگرام نا نیشنل پروگرام منیجر ڈاکٹر محمد اکرم شاہ پارے کہ ’’ سورُک و روبیلا آن چناک بھاز ناجوڑ مریرہ و گڑاس وخت مرک ہم مریک۔ اوپارے کہ ساڑی آ سال تیٹی پاکستان اٹ داناجوڑی تا کیس آتے ٹی ترندی اٹ ودکی مسنے ہراڑآن ہزار آ چناک زہمی مسنو و مرک ہم مسنے ہنداخاطرآن بچفنگ کن ہرچنااسکان ویکسین نا رسینگ المی ءِ’’جاری مروک آ بیان اسے نا رداٹ مہم نجی و سرکاری جان جوڑی ہند، عارضی ویکسی نیشن سینٹرز و تعلیمی ادارہ غاتے ٹی مریک۔ داہیت ذکر انا قابل ءِ کہ مہم اٹ تخوک آ ہدف اٹ نیمہ چنااسکول آتا طالب علم آک ءُ۔ مہم آن پد ایم آر ویکسین 9 تُو و 15 تُو انا وئی نا چناتے کن رکھی ٹیکہ جات نا شیڈول اٹی دوئی مریک۔ پاکستان اٹ جہانی ادارہ جان جوڑی نا سروک ڈاکٹر پلیتھا ماہی پالاپارینے کہ ’’سورُک و روبیلا نا مہم آن دا موذی ناجوڑی تے نئے بیرہ مون ءِ توننگے بلکن مچ آ ملک اٹی داناجوڑی تیان مروک آ چناتا زوال کننگ نا کچ  ہم کم مریک۔ جان جوڑی نا بنداوی آسراتی اساکن رسینگ ہرچنانا بنداوی حق ءِ۔ اوپارے کہ جہانی ادارہ جان جوڑی پاکستانی حکومت تون اسیجائی کوشست کننگ ءِ و داہیت ءِ پک کننگ ءِ کہ ہرچنااسکان ویکسین نا رسینگ ممکن مننگ کے۔ قومی مہم آن سورُک نا ساڑی آ دین انا مون ءِ توننگک۔ حکومت پاکستان نا دا گام آن غٹ چناتے فائدہ مریک۔ پاکستان اٹ یونیسیف نا سروک ایڈاگرماپارے کہ اینو ہم دنیا ءِ سورُک و روبیلا نا متعدی مرض آتا مون تروک ءِ، ویکسین آن دا مرض آتا چٹفنگ ممکن ءِ۔