اسلام آباد۔ 12 نومبر (اے پی پی) اسپیکر قومی اسمبلی اسد قیصر پارینے کہ الیکشن (ترمیمی) بل 2021ء تون اوار چندی بل آتیا دُوارہ سلابتی عمل نا بناءِ کننگ و کانودسازی کن ٹہیفوک آ امنائی کمیٹی نا فورم ءِ کاریم اٹ اتنگے، دا بل آتیا امنائی سلاہ ودی کننگ اٹ اسپیکر آفس حکومت و اپوزیشن ءِ آسراتی فراوان کیک۔ قومی اسمبلی سیکرٹریٹ نا رداٹ اسپیکر قومی اسمبلی اسد قیصر قائد حزب اختلاف شہباز شریف ءِ اسہ چٹھی اس مون تسنے ہراٹی او پارینے کہ اپوزیشن و حکومت گیشتر قومی فائدہ غاتے مون آ تخسا اسیجائی فائدہ غاتا غٹ اہم اصلاحات آ پارٹی سیاست آن ایڑتر مرسا جامع فیصلہ سازی و امنائی سلاہ ودی کننگ کن بایدے مون آ بریر ۔ چندی بلز بشمول الیکشن (ترمیمی) بل 2021ء قومی اسمبلی آن منظور مسنے ولے تخوک آ وخت انا تہہ ٹی سینیٹ آن او منظور مننگ کتو، دابناآ دا بل مجلس شوریٰ نا اسیجائی دیوان اٹی سجفنگ ءِ۔ دا بل آتیا سجفنگ و ترمیم سلاہ کننگ کن حکومت و اپوزیشن نا امنائی سلاہ اٹ کانود سازی نا بابت امنائی کمیٹی اس ٹہیفنگاسس ولے کمیٹی نا کنڈآن سلابتی عمل پورو مننگ کتو۔ اوپارے کہ اومیت ءِ کہ اپوزیشن لیڈر داعمل ءِ بامسخت کننگ کن تینا کڑد ءِ ادا کیک۔ اسپیکر آفس ہندا بل آتیا امنائی سلاہ ودی کننگ اٹ حکومت واپوزیشن ءِ آسراتی فراوان کیک۔
