اسلام آباد۔ 12 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ اوغانستان اٹی نزوری نا حالیت آتیان مچ آ پاکستان زہمی مریک، نن اوغانستان اٹی جامع حکومت اس خوانہ ولے ایلو کنڈآ ننے اوغانستان اٹی انسانی المیہ غا گڑتی ءِ، اوغانستان 40 ملین آبادی نا اسہ بھلو ملک اسے، اوغانستان نا بارواٹ اکانومسٹ نا ساڑی آ رپورٹ پریشانی نا سوب ءِ، کودک چناتے خورک اکن بہاکننگ انگ ءِ ، دنیا ءِ اوغان الس نا کمک کننگ کن مون آ بروئی مریک، فیک نیوز دنیا نا بھاز انگا ملک آتا ویل ءِ، نن خوانہ کہ سفارت خانہ غاتیا ہنوک آ معلومداری بالکل پیدوار مریر۔ داخیال آتا درشانی ءِ او چندی ملک آتا سفارت خانہ غاتا پریس اتاشی تتون گپ وتران کرسا کرے۔ چوہدری فواد حسین پارے کہ اوغانستان اٹی نزوری نا حالیت آن مچ آ پاکستان زہمی مریک، داوخت آ اوغان الس نیزگاری نا زندءِ تیر کننگ ءِ، اکانومسٹ تینا ساڑی آ رپورٹ اٹی پارینے کہ اوغانستان اٹی 23 ملین بندغ خور انا کمتی نا گواچی ءُ، اوغانستان اٹی نیزگاری نا حالیت آتا سوب آن انسانی المیہ ودی مننگ نا گڑتی ءِ، ہندن ءُ ویڈیو مون آ بننگ ءِ ہرافتے ٹی پاننگ انگ ءِ کہ کودک چناتے خور اکن بہاکننگ انگ ءِ۔ اوپارے کہ دنیا ءِ اوغان الس نا کمک کننگ کن مون آ بروئی مریک۔ بنجائی وزیر حوالکاری پارے کہ نن اوغانستان اٹی جامع حکومت اس خوانہ، ولے ایلو کنڈآ ننے اوغانستان اٹی انسانی المیہ غا گڑتی ءِ۔ بنجائی وزیر حوالکاری پارے کہ قبائلی علاقہ غاتے ٹی نن مریس وخت اسکان جنگ کرین، ہراتم نن آپریشن نا بناءِ کرین تو 40 آن 45 ہزار پاکستانی اوغانستان آ ہنار، دا غٹ پاکستانی ءُ، اوفتے پدی بننگ نا موقع اس فراوان کننگے۔ فیک نیوز و جعلی خبرتا ذکر ءِ کرسا چوہدری فواد حسین پارے کہ ٹیکنالوجی نا زیات کاریم اٹ اتنگ آن فیک نیوز و جعلی نیوز نا ویل ودی مس۔ بنجائی وزیر حوالکاری امریکہ نا مسکوہی صدر اوباما نا حوالہ ءِ ترسا پارے کہ امریکہ نا مسکوہی صدر اوباما 2003ء ٹی پاریسس کہ پوسکن آ دور اٹی حکومت آتا غٹ آن بھلا چیلنج فلوآف انفارمیشن ءِ منظم کننگ ءِ۔ اوپارے کہ فلو آف انفارمیشن نا چیلنج غٹ ملک آتے مون تروک ءِ۔ غٹ ملک آک کانود سازی نا کمک اٹ داویل اتون مون تننگ نا کوشست کننگ ءُ۔ اوپارے کہ یورپی یونین، امریکہ و برطانیہ ہم فیک نیوز و جعلی پروپیگنڈا نا مون ءِ توننگ کن گام گیج کننگ ءُ۔ چوہدری فواد حسین پارے کہ پاکستان نا میڈیا نا شمار پدتموک ملک آتا میڈیا ٹی اسہ بھلو میڈیا سے نا وڑاٹ مریک۔ پاکستان اٹ 200 آن زیات ٹی وی چینلز، 2 ہزار آن زیات ویب سائٹ و یوٹیوب چینل کاریم کننگ ءُ، داڑے 1500 آن زیات ہڑدے ئی اخبار و سد آ ہفتہ وار و ماہانہ اخبار شینک مریرہ، کم و ود 48 جہانی نیوز چینل پاکستان اٹ کاریم کننگ ءُ۔ بنجائی وزیر حوالکاری پارے کہ نن پوسکن آ کانود سازی اتنگ نا کوشست کننگ اُن، پی ایم ڈی اے نا آئیڈیا سلاہ کننگ نا مسخت غٹ کانود آتے یکجا کننگ ئس، ریگولیشن نا ساڑی آ میکنزم نا رداٹ نیمہ درزن آن زیات فرسودہ کانود ساڑی ءُ ہرا پوسکن آ دور انا خواست آتیا پورو سلپسہ۔ اوپارے کہ داوخت آ ہفت ریگولیٹری باڈی میڈیا ادارہ غاتے چلیفنگ ءُ، داکانود ڈیجیٹل انقلاب آن مست تیار مس، نن دا کانود ءِ پوسکن آ دور انا خواست آتون ہم گرنچ کننگ خوانہ۔ اوپارے کہ پوسکن آ دور اٹی ٹیلی ویژن، ریڈیو و اخبار موبائل فون نا بشخ جوڑ مسنے۔ اینو نن وٹس ایپ آ بروک آ معلومداری تے ٹویٹ کینہ تو او معلومداری ریڈیو، ٹی وی و اخبارات آتسکان آسانی اٹ سرمریرہ۔ بنجائی وزیر حوالکاری پارے کہ بھارت پاکستان نا برخلاف کیہی باندات آتیا غلط و جعلی پروپیگنڈا کرے، دابیرہ پاکستان نا ویل اف، بھاز انگا ایلو ملک آک ہم دا وڑنا ویل آتا گواچی ءُ، فیک نیوز نا چٹفنگ کن جہانی کہول آ بایدے کوشست کننگے، ننے جہانی کوشست آتا کمک اٹ سوشل میڈیا ریگولیشنز و میڈیا نا رکھ ءِ پک کروئی مریک۔ اوپارے کہ جہانی کہول آ میڈیا نا ضابطہ و اقوام متحدہ نا پابندی بایدے مرے تانکہ پین ملک اسےنا برخلاف سوشل میڈیا غا خارتس و سٹی ءُ خبرتالان کننگ مف۔ اوپارے کہ وزارت حوالکاری سفارت خانہ غاتے ٹی حوالکاری نا بشخ آن تعلق تخوک آ بندغ آتون رابطہ تخر، وزارت حوالکاری پاکستان نا بھلا وزارت آتیان اسٹ ءِ، ایکسٹرنل پبلسٹی ونگ وزارت حوالکاری نا اہم ءُ ادارہ اسے، پاکستان نا نکتہ نظر پیشن نا دنیا ٹی پیش کننگ و جہانی میڈیا غان باخبر مننگ ای پی ونگ انا اولی زمواری تیٹی اوار ءِ۔
