اسلام آباد۔ 10 نومبر (اے پی پی) صدر مملکت ڈاکٹر عارف علوی پارینے کہ ڈیجیٹل پاکستان ننا وژن ءِ، انفارمیشن ٹیکنالوجی نا بشخ اٹی شونداری آن پاکستان نا جم قومی پیدوار ءِ ودفنگ کینہ، ملک اٹی آئی ٹی نا گریجویٹ آتا کچ ءِ ودفنگ نا گرج ءِ، الس ءِ فیک نیوز نا بارواٹ معلومدار کروئی مریک، دنیا ٹی ٹیکنالوجی ترندی اٹ شون ہلنگ ءِ، شونداری نا سفر اٹ مون آ ہِننگ کن چین آنبار زوت فیصلہ کروئی مریک۔ صدر مملکت چارشنبے نادے آ داڑے قومی براڈ بینڈ نیٹ ورک فورم آن تران کریکہ۔ دود آن پاکستان ٹیلی کمیونیکیشن اتھارٹی (پی ٹی اے) نا چیئرمین میجر جنرل (ر) عامر عظیم باجوہ، بنجائی سیکرٹری انفارمیشن ٹیکنالوجی ڈاکٹر محمد سہیل راجپوت و ٹیلی مواصلاتی کمپنی تا سروک و نمائندہ غاک ہم تران کریر۔ ڈاکٹر عارف علوی فورم نا اڈتننگ آ پی ٹی اے و ہواوے ءِ مبارکبادی پیش کرے۔ اوپارے کہ دنیا نا ہر ملک اٹی ٹیکنالوجی نا بارواٹ فیصلہ سازو مخلوق نا نیام اٹ جنریشن گیپ مریک، انفارمیشن ٹیکنالوجی کن المی ءِ کہ او ترندی اٹ شون ہلے۔ صدر مملکت پارے کہ آئی ٹی نا بشخ اٹی شونداری کن حکومت تینا ہرممکن کڑد ءِ ادا کیک، حکومت نا کوشست مریک کہ او داٹی آسراتی کڑد اداکے۔ اوپارے کہ حکومت ہراوڑ درآمدات و برآمد آتون اوار زرگزران نا چندی بشخ آتے ٹی توازن ودی کننگ کن کوشست کننگ ءِ ، او آئی ٹی نا بشخ انا شونداری کن ہم تینا اولیت آتا تعین ءِ کیک۔ صدر پارے کہ ڈیٹا نا کاریم اٹ اتنگ المی ءِ، دنیا تون داخہ در ڈیٹا ارے کہ اوفتا جاچ ءِ ہلنگ ہم مشکل ءِ، آخبت اٹ ڈیٹا نا کاریم اٹ اتنگ نا بارواٹ اوپارے کہ پاکستان تحریک انصاف مستین اٹ تنظیم سازی کن سمارٹ فون تے کاریم اٹ ایس و داٹی 3.5 ملین کارندہ غاک وونٹ تسوسر، پاکستان اٹ بروک آ گچین کاری تیٹی الیکٹرانک ووٹنگ مشین نا کاریم اٹ اتنگ خوانہ ہراڑکن الس اٹ آگاہی ودی کننگ اُن۔ اوپارے کہ ٹیکنالوجی ٹی جدت بننگ ءِ براڈ بینڈ اٹ ہم ودکی بسنے، ٹیکنالوجی نا شونداری کن آخبت نا گرج آتے ہم مون آ تخوئی مریک، مستین اٹ پاکستان ٹیلی کمیونیکیشن اتھارٹی گرے ٹیلیفونی ءِ توننگ کن کوشست کرے، فیک نیوز نا سیلاب اسے، اودے توننگ و مخلوق اٹ دانا بابت آگاہی ودی کننگ نا گرج ءِ۔ صدر مملکت پارے کہ دنیا و نن ہیل کننگ اُن ولے چندی گڑاک نما کنٹرول آن پیشن ءُ، بھارت اٹ 2019نا گچین کاری تا ذکر ءِ کرسا اپارے کہ دا گچین کاری تیٹی سوشل میڈیا نا 70 درسد خبرآک جعلی ئسر۔ ڈاکٹر عارف علوی پارے کہ ملک اٹ آئی ٹی نا گریجویٹ آتا کچ بھاز کم ءِ ہرافتے ودفنگ کن غٹ یونیورسٹی تے پارت کننگانے، آئی ٹی گریجویٹ آتا کچ ءِ بایدے ودفنگے و حکومت دا عمل نا است بڈی ءِ کیک ولے صدر دا پیدوار کرے کہ آئی ٹی نا بشخ اٹی کسبکار بندغ آتے تیار کرسا اوفتے پیشن نا ملک آتا جاگہ غا ملک انا شونداری کن کاریم اٹ اتنگک۔ اوپارے کہ ملک اٹ سینہ نا کینسر نا آگاہی مہم اٹی پی ٹی اے نا اہم ءُ کڑد اسے، کورونا دین انا حالیت آتے ٹی حکومت نا گچین فیصلہ غاتا سوب ای کامرس و ٹیکنالوجی نا کاریم اٹ اتنگ واودے شون تننگ ناعمل آسان مس۔ آئی ٹی و پوسکن آ ٹیکنالوجی نا کاریم اٹ اتنگ آن ناجوڑی تا ہم مون ءِ توننگ اٹ کمک رسینگک، حقدار آتے بینک اکاؤنٹ آتا کمک اٹ زر فراوان کننگ انگ ءِ۔ پاکستان ٹیلی کمیونیکیشن اتھارٹی (پی ٹی اے) نا چیئرمین میجر جنرل (ر) عامر عظیم باجوہ دود آن تران کرسا پارے کہ اولیکو قومی براڈ بینڈ نیٹ ورک فورم نا اڈتننگ ڈیجیٹل پاکستان نا کنڈآ اسہ اہم ءُ گام اسے۔
