اسلام آباد۔ 10 نومبر (اے پی پی) پارلیمانی سیکرٹری کانود و انصاف ملیکہ علی بخاری قومی اسمبلی ءِ پارینے کہ ماڈل کورٹس انا بابت سرجم آک بڑزکو عدلیہ تون ءُ، ہراتم ننے بڑزکو عدلیہ غان سرجم آک معلوم مسر نن ایوان اٹ پیش کینہ۔ چارشنبے نادے آ قومی اسمبلی ٹی وقفہ سوج آتے ٹی طاہرہ اورنگزیب نا سوج انا ورندی ٹی پارلیمانی سیکرٹری کانود و انصاف ملیکہ بخاری پارے کہ ماڈل کورٹس انا بابت انفارمیشن ننا دنگ اٹی اف، نن بڑزکو عدالت ءِ بیوس کننگ کپنہ، نن کیہی وار چٹھی نوشتہ کرینن، ہندن کہ ورندی ملک ، نن ایوان اٹ سرجم آتے پیش کینہ۔ عبدالقادر مندوخیل نا ضمنی سوج انا ورندی ٹی پارلیمانی سیکرٹری ملیکہ بخاری پارے کہ نن پارینن نن تون انفارمیشن اف، داسرجم آک بڑزکو عدالت تون ءُ۔ چوہدری فقیر احمد نا سپریم کورٹ اٹی ڈیم فنڈ انا بابت سوج انا ورندی ٹی پارلیمانی سیکرٹری ملیکہ بخاری پارے کہ سیکرٹری کانود رجسٹرار سپریم کورٹ ءِ چٹھی نوشتہ کیرہ، نن ہر ادارہ نا شرف ءِ کینہ، نن تینا دنگ اٹ سلسا کاریم کینہ۔ نفیسہ عنایت اللہ خٹک نا سوج انا ورندی ٹی پارلیمانی سیکرٹری کانود و انصاف ملیکہ بخاری پارے کہ داہیت راست ءِ کہ اسلام آباد ہائی کورٹ و ماتحت عدالت آتیٹی جج آتا آسامیک خورک ءُ، داآسامیک ہائی کورٹ نا چاروکی اٹ پُرمریرہ۔ وزارت کانود عدالت آن دا آسامی تے پُر کننگ نا خواست کیک۔
