اسلام آباد۔ 09 نومبر (اے پی پی) صدر مملکت ڈاکٹر عارف علوی مصور پاکستان علامہ اقبال نا ودی دے آ اودے شاندار خراج عقیدت پیش کرسا پارینے کہ او تینا تقریر، نوشت و عملی گام گیج آتا کمک اٹ برصغیر نا مسلمان تے خاچوک آ تغ آن بش کرے و اوفتے ٹی پوسکن ءُ جوش و ولولہ اس ودی کرے، علامہ اقبال مسلمان تے مون آ ہِننگ و دنیا ٹی تینا ہند اس ودی کننگ کن علم و کسب دوئی کننگ نا ترغیب تس، ہندوستان اٹی مسلمان تے شونداری و انصاف نا وارخواہی تننگتو، بھارت اینو مسلمان و ایلو اقلیت آتون ناروا و متعصبانہ سلوک کننگ نا کمک اٹ تینا تاریخ ءِ چٹفنگ اٹ لگوک ءِ، پوسکن آ دور اٹی مون آ ہِننگ کن علم دوئی کننگ آن بیدس پین ہچ ءُ کسر اس اف۔ او سے شنبے نادے آ داڑے بحریہ یونیورسٹی ٹی علامہ اقبال نا ودی دے انا رداٹ اڈ ہلوک آ ارٹ میکو کانفرنس نا بنائی سیشن آن تران کریکہ۔ داوخت آ سینیٹر ولید اقبال، ریکٹر بحریہ یونیورسٹی وائس ایڈمرل کلیم شوکت، وائس چانسلر رفاہ یونیورسٹی پروفیسر ڈاکٹر انیس احمد و پروفیسر ڈاکٹر عادل مسعود ئسک ہم تران کریر۔ صدر مملکت تینا تران اٹی مصور پاکستان علامہ محمد اقبال ءِ اونا ودی دے آ خراج عقیدت پیش کرسا اونا شخصیت نا اہم پلو آتے تالان کرے۔ اوپارے کہ علامہ اقبال امت مسلمہ نا نشاۃ ثانیہ نا بھاز بھلو داعی اس ئس، او تینا تقریر، نوشت و کلہو آتا کمک اٹ برصغیر نا مسلمان تے خاچوک آ تغ آن بش کرے و اوفتے ٹی آجوئی نا بابت جوش و ولولہ ودی کرے۔ صدر مملکت پارے کہ ہندوستان اٹی مسلمان تے شونداری و انصاف نا وارخواہی تننگتو، بھارت اینو مسلمان و ایلو اقلیت آتون ناروا و متعصبانہ سلوک نا کمک اٹ تینا تاریخ ءِ چٹفنگ اٹ لگوک ءِ، تینا متعصبانہ سوچ و ظلم آن اوتینے خاخر لگفنگ ءِ۔ اوپارے کہ پوسکن آ دور علمانا بابت بھاز ترندی اٹ شون ہلنگ ءِ، ہنداخاطرآن مون آ ہِننگ کن علم دوئی کننگ آن بیدس پین ہچ ءُ کسر اس اف۔ صدر مملکت پوسکن آ علم خاص وڑاٹ انفارمیشن ٹیکنالوجی آن فائدہ ہرفنگ و ذہانت و حکمت ءِ کاریم اٹ اتنگ نا گرج آ زور شاغا و پارے کہ علم و شعور آن قومک ٹہیفنگرہ۔داکان مست سینیٹر ولید اقبال بحریہ یونیورسٹی نا کنڈآن اقبال دے انا رداٹ کانفرنس نا اڈتننگ آ منت واری ءِ ہرفے۔ اوپارے کہ علامہ اقبال پوسکن آ دنیا نا چیلنج آتیان عہدہ بر مننگ کن سائنسی علم انا دوئی کننگ نا مخ تف ئس، اومسلمان تا راہشونی کن سائنسی کتاب آتا اردو ترجمہ غاتیا زور شاغا۔ بحریہ یونیورسٹی نا ریکٹر وائس ایڈمرل کلیم شوکت تینا تران اٹی صدر مملکت نا کانفرنس اٹ بشخ ہلنگ آ خیرمقدم ءِ کرے۔ اوپارے کہ علامہ اقبال امہ نا روحانی، راجی، سائنسی و تیکنیکی نشاۃ ثانیہ نابحالی ءِ خواہسکہ۔ اوپارے کہ اقبال نا کلہوآتے مون آ تخسا ورناتے اسلامی اصول آتیان راہشونی دوئی کننگ نا گرج ءِ۔ پروفیسر ڈاکٹر انیس احمد مسلمان تا شناخت نا بابت اقبال نا تصور آتے تالان کرے و پارے کہ او تینا رغاموک آتے ٹی قرآن و سنت آ مبنی سو چ ءِ لس کرے۔ داوخت آ پروفیسر ڈاکٹر عادل مسعود بشخ ہلوک آتے اقبال نا ہمہ جہتی و امت مسلمہ نا راجی سائنسی و تیکنیکی نشاۃ ثانیہ نا سرحال آ ارٹ میکو جہانی کانفرنس نا گرج و مسخت آتیان معلومدار کرے۔
