اسلام آباد۔ 09 نومبر (اے پی پی) چیئرمین سینیٹ محمد صادق سنجرانی پارینے کہ نن عظیم مفکر علامہ اقبال ؒ نا سوچ و فکر ءِ بایدے تالان کین و اونا روغاموک آتیا عمل کرسا وطن عزیز ءِ فرقہ پرستی، انتہاپسندی، دہشت گردی کون آ برائی تیان پاک کرسا حقی وڑاٹ اسلامی آسودہی ریاست نا وڑاٹ شون ایتن و اقوام عالم اٹ عزتی ءُ ہند اسے آ فیض دوئی کین۔ داہیت ءِ او شاعر مشرق علامہ اقبال نا ودی دے انا وخت آ جاری تینا کلہو اٹی پارے۔ اوپارے کہ غٹ اہل وطن و ملت اسلامیہ مفکر اسلام و شاعر مشرق ڈاکٹر علامہ اقبال ؒ نا 144 می ودی دے انا وخت آ پبی وڑاٹ خراج عقیدت پیش کننگ ءُ۔ ڈاکٹر علامہ اقبال ؒ برصغیر پاک و ہند انا عظیم و مدبر ءُ راہشون اس ئس و اونا خذمت آتے نئے بیرہ یات تخنگک بلکن مچ آ قوم احسان مند ہم مریک۔ چیئرمین سینیٹ پارے کہ علامہ اقبال ؒ خطبہ آلہ آباد اٹی پاکستان ناتصور ءِ پیش کرسا برصغیر نا مسلمان تیٹی آجوئی دوئی کننگ نا پوسکن ءُ ساہ اس شاغا ہراڑآن اوفتا اسیجائی مزل نا پیدواری مس۔ علامہ اقبال ؒ تینا قائدانہ لائخی تا سوب آن برصغیر نا مسلمان تے آجوئی نا دوئی کننگ کن عملی جہد آ راضی کرے و دا ہمو جہد نا صلہ ءِ کہ اینو نن آجو و جمہوری وطن اسے ٹی تینا زند ءِ تیر کننگ اُن۔ اوپارے کہ علامہ اقبال ؒ برصغیر نا ہمو جلیل القدر ہستی تیٹی اوار ءِ ہرافک دا ڈیہہ نا مسلمان تے غلامی نا زمزیر آن نجات ترفنگ کن جداگانہ قومیت اسے نا احساس ءِ تالان کریر۔ او برصغیر نا مسلمان تا مسلمہ لیڈر ئس ہرا قومی و ملی شاعری نا کمک اٹ مسلمان تا جوزہ غاتے متحرک تخا۔ قائد اعظم محمد علی جناح تینٹ علامہ اقبال ؒ نا قائدانہ لائخی تا معترف ئس۔ چیئرمین سینیٹ صادق سنجرانی پارے کہ علامہ اقبال ؒ مدام سیوت و سخا نا پارت کرے او برصغیر نا مسلمان تے تینا شاعری نا کمک اٹ ہندن ءُ وخت اسے ٹی کسر نشان تس ہراتم او غلامی نا تہاری تیٹی تینا مزل نا پدرند ءِ گوہاسر ۔ اوفکروافکار ہموچراغ ءِ روشنا کرے ہرافتے برصغیر نا مسلمانک کیہی صدی تیان پٹارہ۔ علامہ اقبال ؒ نا فکر اتون تعلقداری نا دا خواست ءِ کہ نن اونا سوچ ءِ نئے بیرہ سمجھن بلکن اوڑآ عمل کرسا پاکستان ءِ حقی وڑاٹ ہموریاست جوڑ کین ہرانا تصور ءِ علامہ اقبال ؒ پیش کریسس و اودے عملی دروشم اس قائد اعظم محمد علی جناح تس۔ اوپارے کہ اینو نادے انا اہمیت نا رداٹ نن عظیم مفکر نا سوچ و فکر ءِ بایدے تالان کین و علامہ اقبال ؒ نا رغاموک آتیا عمل کرسا وطن عزیز ءِ فرقہ پرستی، انتہاپسندی، دہشت گردی کون آ برائی تیان پاک کرسا حقی وڑاٹ اسلامی آسودہی ریاست اسے نا وڑاٹ شون ایتن ۔
