اسلام آباد۔ 09 نومبر (اے پی پی) وزیر مملکت حوالکاری و شینکاری فرخ حبیب پارینے کہ اینو غٹ اہل وطن و ملت اسلامیہ مفکر اسلام و عظیم فلسفی شاعر ڈاکٹر علامہ محمد اقبال ءِ پبی خراج عقیدت پیشش کننگ ءُ ، اینونادے نن اقبال نارغاموک آتے یات کننگ تون اوار اوار داہم سجفن کہ او ہراسرسہبی نا کسرتے ننے نشان تس اوفتیا نن اخس عمل کرین۔ داخیال آتا درشانی ءِ او شاعر مشرق ڈاکٹر علامہ محمد اقبال نا 144 می ودی دے آ تینا کلہو اٹی کرے۔ وزیر مملکت پراے کہ اینو نادے نن قول کین کہ علامہ قبال نا تغ ءِ حقیقت اٹ بدل کننگ کن نن مست آن زیات و سخت خواری کینہ۔ اوپارے کہ علامہ اقبال نا کلہو و فلسفہ ءِ پہہ مننگ نا اخس گرج اینو ءِ داکان مست الوکہ۔ وزیر مملکت پارے کہ ڈاکٹرعلامہ اقبالؒءِ برصغیر نا مسلمان تیکن جتا ءُ وطن اسے نا تصور پیش کننگ آ مدام یات تخنگک۔ فرخ حبیب پارے کہ علامہ اقبال نا پاروک آتیان ننے اسلام نا حقی کلہو ءِ پہہ مننگ اٹ کمک ملک، اومسلمان تا حقی شناخت کن اوفتے خاچوک آ تغ آن بیدار کننگ کن کوشست کرے، ہنداسوب آن نن اسہ آجو ءُ ملک اسے ٹی آرام اٹ ساہ ہلنگ اُن۔ اوپارے کہ آجوئی اسہ بھلو نعمت اسے، آجوئی کن تروک آ قربانی تے اسُل است آن دننگ مفک۔
