اسلام آباد۔ 08 نومبر (اے پی پی) وزیراعظم عمران خان پارینے کہ منافع خوری و کوڑی کروک آتے ہچ ءُ حالیت اسے ٹی سگنگ پننگک، الس ءِ ریلیف تننگ کن صوبائی و ضلعی حکومت آک فیلڈ اٹ خننگر، احساس راشن، سرسہب پاکستان، بزغرکارڈ، جان جوڑی کارڈ و احساس پروگرام نا ایلو اسکیم تے نیزگار تپہ ءِ ریلیف تننگ کن جاری کننگانے۔ الس نا مون آ راستکی و حساب وکتاب ءِ پیش کننگے و گچین آگاہی مہم اس چلیفنگے، کوڑی کروک و ناروا منافع خوری کروک آ بندغ آتا برخلاف سخت کارروائی کننگے۔ اوداخیال آتا درشانی ءِ دوشنبے نادے آ داڑے نہاد آتیا کنٹرول نا بابت دیوان نا کماشی ءِ کرسا کرے، دیوان ءِ بورہ نا اسٹاک و نہاد آتا بابت سرجم حوال تننگا۔ دیوان ءِ معلومدار کننگا کہ داوخت آ ملک اٹی بھلو کچ اسے ٹی بورہ ارے۔ ولے سندھ انا شوگر مل آتا بندش نا فیصلہ غان نہادآک ودانو۔ دیوان ءِ پاننگاکہ سندھ خولم تنکی ٹی ہم بنجا وایلو صوبہ غاتا فیصلہ غاتیان اختلاف کرے ہرانا سوب آن ہلہلہ ئی حالیت آتون مون تروئی تما۔ وزیراعظم دیوان آن تران کرسا پارے کہ جہانی مارکیٹ اٹی گڑاتا نہاد آک ودنگ ءُ و دُن تو پاکستان درآمدی گڑاتیا سیبو کیک ہنداخاطرآن ہندی مارکیٹ آ اثرمرتب مننگ ءِ۔ ولے حکومت نیزگار تپہ غا بھاریم ءِ کم کننگ کن ہرممکن گام گیج کننگ ءِ۔ احساس راشن، سرسہب پاکستان، بزغرکارڈ، جان جوڑی کارڈ و احساس پروگرام نا ایلو اسکیم تے نیزگار تپہ ءِ ریلیف تننگ کن جاری کننگانے۔ وزیراعظم پارے کہ الس نا مون آ راستکی و حساب وکتاب ءِ پیش کننگے و گچین آگاہی مہم اس چلیفنگے۔ کانود نا رداٹ کوڑی کروک و ناروا منافع خوری نا مرتکب بندغ آتا برخلاف سخت کارروائی کننگے۔ حکومت سیاست آن ایڑتر مرسا الس نا خذمت آ چکار کرینے و کبینی نا اثرآتا احساس تخک۔ اوپارے کہ بورہ مافیا و کوڑی کروک آتا برخلاف شوگرفیکٹریز(کنٹرول ) ترمیمی ایکٹ 2021، پنجاب پریوینشن آف ہورڈنگ ایکٹ 2020 و پنجاب رجسٹریشن آف گوڈاونزایکٹ 2014 نا کانود آ ہرحال عملدرآمد ءِ پک کننگے، منافع خوری و کوڑی کروک آتے اسُل سگنگ پننگک۔ وزیراعظم پارے کہ الس ءِ ریلیف تننگ کن صوبائی و ضلعی حکومت آک فیلڈ اٹی خننگر۔ دیوان اٹی فیصلہ کننگاکہ کوڑی کروک و ناروا منافع خوری کروک آ بندغ آتا برخلاف سخت کانودی چارہ جوئی کننگک۔ دیوان اٹی بنجائی وزیر محمد حماد اظہر، چوہدری فواد حسین، مخدوم خسرو بختیار، سید فخر امام، ڈاکٹر فروغ نسیم، سلاہکار خزانہ شوکت فیاض ترین، سلاہکار داخلہ مرزا شہزاد اکبر، خصوصی کمکار ڈاکٹر شہباز گل و چیئرمین ایف بی آر ئسک ساڑی ئسر وخت اس کہ ویڈیو لنک آن چیف سیکرٹری پنجاب، بلوچستان و خیبرپختونخواآن سینئر آفیسر آک بشخ ہلکر۔
