ورناتے ہر آسراتی نا فراوانی وزیراعظم عمران خان نا وژنءِ، انکم خراج و جی ایس ٹی آن بیدس ایلو خراج آتے اِرا مسہ سال اٹی چٹفنگک، سلاہکار خزانہ شوکت ترین

اسلام آباد۔ 08 نومبر (اے پی پی) سلاہکار خزانہ شوکت ترین پارینے کہ ورناتے ہر آسراتی نا فراوانی وزیراعظم عمران خان نا وژن ءِ، ورناتا کاریم نا کچ اٹی ودکی آن ملک شونداری نا شاہراہ غا ترندی اٹ گامزن مریک، سرسہب ورناپروگرام ورناتا شونداری ٹی اہم ءُ کڑد اس ادا کننگ ءِ، ننا مسخت آسودہی مملکت نا ٹہیفنگ و ملک ءِ شاندار زرگزرانی آخبت فراوان کننگ ءِ ہراڑکن ننے غٹ ءِ خراج تروئی مریک، حکومت خراج تروک و کاروباری برادری ءِ ہرممکن آسراتی فراوان کیک۔ داخیال آتا درشانی ءِ او دوشنبے نادے آ اسلام آباد چیمبرآف کامرس اٹی سرسہب ورناکنونشن آن تران کرسا کرے۔ سلاہکار خزانہ پارے کہ انسانی وسیلہ غاک ہر ملک یا قوم انا شونداری میرات مریرہ ہرافتے سہی وڑاٹ تراشسا ملکی شونداری و شونہالی نا مزل ءِ طے کننگ مریک۔ اوپارے کہ قائد اعظم محمد علی جناح ورناتے تینا جانشین گونداسس ولے بدبختی اٹ مستین دا نہادی میرات آتے گوجالنگا ولے داسہ وزیراعظم عمران خان نا وژن ءِ کہ اوفتے ہرہمو آسراتی تننگے ہراڑآن ورناک سرسہب مرسا ملکی شونداری ٹی تینا بشخ ءِ شاغر، و ہنداسوب ءِ کہ او عثمان ڈار نا ولولہ انگیز کماشی ٹی سرسہب ورنا پروگرام نا بناءِ کرے و دا پروگرام بھرمی پک مننگ ءِ۔ اوپارے کہ عثمان ڈار داکان پد سرسہب بزغر پروگرام نا بناءِ کننگ نا ہیت کرے، ولدا بینک آتا تربیت نا ہیت بس انتئے کہ اوفتے چنکو وام تا فراوانی نا آزموندہ الوکہ ہراڑکن نن اسہ یکتا ءُ فارمولا اس مرتب کرینن۔ اوپارے کہ سرسہب بزغرپروگرام نا رداٹ چار ملین اُراتا 3 کروڑ بندغ آتے فصل و مشینری کن بے سود وام تا فراوانی نا پروگرام اس جوڑ کیک ہرانا رداٹ یک و نیم لکھ فصل و 2 لکھ کشاری مشینری کن فراوانی نا فیصلہ ءِ کننگانے، اوکان پد تینا اُرااسکیم کن بے سود وام تا جاری کننگ و جان جوڑی انصاف کارڈ پروگرام نا بناءِ کننگانے۔ اوپارے کہ داغٹ پروگرام تا مسخت ملکی آبادی نا 60 درسد آ تالان 30 سال آن کم وئی نا ورناتے آسراتی تننگ ءِ انتئے کہ ورناتا کاریم نا کچ انا ودکی آن ملکی شونداری ٹی کڑد ادا کننگ نا قابل کننگ مریک۔ چنکا و نیامی درجہ نا صنعتی شونداری آ چکار کننگ انگ ءِ، آئی ٹی نا بشخ انا شونداری کن ہم خصوصی گام گیج کننگ انگ ءِ۔ اوپارے کہ بھاز انگا دنیا نا ملک آک مادی وسیلہ غاتیان بیدس انسانی وسیلہ غاتیا زرکاری کرسا شون ہلکونو، اوفتیان جاپان نا درور غٹ انا مون آٹے ہراانسانی وسیلہ غاتے تعلیم، تربیت و جان جوڑی نا آسراتی ترسا ملکی شونداری ٹی کڑد ادا کننگ نا قابل کرے۔ اوپارے کہ پوریاگر آتون اوڑدہی ٹی اوفتیا پیدوار کرینن کہ خراج تو ننے غٹ ءِ تروئی مریک اگہ نم خراج تفیرے تو نن شون ہلنگ کپنہ۔ ننتون غٹ انا بل، بینک اکاؤنٹس، گاڈی، سفری معلومداری، ہنکین پین پین نا سرجم آک بسنو، داسہ نن مصنوعی ذہانت ءِ کاریم اٹ اتسا کٹیا تا کساس ءِ خلینہ و خراج نا بل ءِ گدریفینہ۔