اسلام آباد۔ 08 نومبر (اے پی پی) وزیراعظم نا خصوصی کمکار امور نوجوانان عثمان ڈار سرسہب ورناپروگرام نا اہم خصوصیات آتے مون آ تخسا پارینے کہ داپروگرام نا رداٹ ورناتے کاروبار کن اسہ لکھ آن ہلیس دونیم کروڑ روپئی اسکان وام تننگ انگ ءِ۔ داخیال آتا درشانیءِ او اسلام آباد چیمبر آف کامرس اینڈ انڈسٹری نا کمک اٹ اڈ ہلوک آ سرسہب ورناکنونشن آن تران کرسا کرے۔ اوپارے کہ ورناتے کاروبار کن وام تا فراوانی کن حکومت اسہ سد ارب روپئی جتا کرینے ہرافتیان 22 ہزار ورناتے کن 30 ارب روپئی نا وام تے منظور کننگانے وخت اس کہ ایلو زر ءِ ہم زوت منظور کننگک۔ اوپارے کہ سرسہب ورناپروگرام داتم اسکان پنجا ہزار ملازمت ودی کرینے و سکلز فار آل پروگرام نا رداٹ ٹریننگ ہلوک آتیان 60 آن 70 درسد ءِ ملازمت ملنگ ءِ۔ اوسرسہب ورناپروگرام اٹ کمک کننگ آ اسلام آباد چیمبرآ ف کامرس، نیوٹیک و بینک آتون اوار ایلو ادارہ غاتا ہم منت واری ءِ ہرفے۔ تینا بیابخیری تران اٹی اسلام آباد چیمبر آف کامرس اینڈ انڈسٹری نا صدر محمد شکیل منیر ورناتا شونداری کن وزیراعظم پاکستان نا کنڈآن سرسہب ورناپروگرام نا بناءِ کننگ نا ستاءِ کرے انتئے کہ داڑآن بھاز انگا ورناتے تینا آخبت ءِ گچین کننگ نا وارخواہی فراوان مریک۔ اوباور کرفے کہ چیمبر داپروگرام ءِ سرسہب کننگ کن حکومت تون پورو کمک کیک۔ اوپارے کہ ورناک ملک انا غٹ آن نہادی میرات ءُ و ورناتا کاروبار نا کسب ءِ تینا کرسا پاکستان ءِ ترند رفتار زرگزرانی شونداری نا کنڈآ دننگ کیرہ وخت اس کہ داڑآن بے روزگاری نا ویل ہم کم مریک۔ اوپارے کہ حکومت پوائنٹ آف سیل نا خلنگ، ڈیجیٹل زرتس، بینک اکاؤنٹس ءِ منسلک کننگ و نادرا نا کنڈآن خراج تروک آتا ڈیٹا ءِ ایف بی آر تون شیئر کننگ تون اوار پوریاگر تا خراج باندات آ غٹ گڑتی تے مر کے و داچرجوئی ٹی اوفتے سلابت اٹ اوار کے۔ اوپارے کہ سلاہکار خزانہ بروک آ بجٹ ءِ گڈیکو دروشم اس تننگ آن مست غٹ اہم چیمبر آتا دورہ ءِ کرسا بجٹ سلاہ آ سلابت کے و غٹ آن مست آئی سی سی آئی آن بجٹ آ سلابت نا عمل نا بناءِ کننگے۔
