اسلام آباد۔ 08 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستان نا کورونا نا دین انا برخلاف جوان حکمت عملی نا مچ آ دنیا ستاءِ کرے، ہندا حکمت عملی نا سوب آن اینو ننا حالیت آک دنیا نا مقابلہ ٹی بھاز جوان ءُ، سیاسی مخالف آتا کاریم مایوسی و دروغ تالان کننگ ءِ، تحریک انصاف نا کارندہ غاک راستکی تے بیان کننگ اٹ تینا کڑد ءِ ادا کیر۔ دوشنبے نادے آ تینا اسہ ٹویٹ اسے ٹی وزیر حوالکاری پارے کہ پاکستان جتا ءُ سیارہ سے آ اف، حقیقت دادے کہ اینو پاکستان نا انڈسٹری بحال مسنے، کنسٹرکشن سیکٹر پورووڑاٹ فعال ءِ، کشاری زرگزران شونہال ءِ و آئی ٹی ایکسپورٹس اٹ مسہ ہنداخہ پین ودکی مسنے۔ اونا پاننگ ئس کہ مزور، بزغر و انڈسٹری غٹ انا کٹیا تیٹی ودکی مسنے و انشاء اللہ شش آن ہشت تُواٹی جہانی نہاد آک ہم نارمل مننگ نا بناءِ کیرہ۔
