اسلام آباد۔ 08 نومبر (اے پی پی) الیکشن کمیشن آف پاکستان نا ترجمان پارینے کہ مچ آملک اٹی اینو آن گچین کاری فہرست آتیا نظرثانی کن الیکشن کمیشن نا پک کروک عملہ، اُرااُراوونٹر آتا پک کننگ نا مہم نا بناءِ کرینے تانکہ 2023 نا لس گچین کاری تیکن شفاف و ردینک آتیان پاک گچین کاری فہرست آتے وخت آ تیار کننگ مرے، اُرااُرا وونٹر آتا پک کننگ نا دا ریسہ 6 نومبر 2021اسکان برجاسلک، داڑتون اوار اوار خیبرپختونخوا نا 17ضلع غاتے ٹی بلدیاتی گچین کاری 19 دسمبر 2021 آ مریک ہراڑکن غٹ تیاریک پورو ءُ۔ دوشنبے نادے آ الیکشن کمیشن نا کنڈآن جاری بیان اٹ پاننگاکہ شیڈول نا رداٹ پندار کاغد جماعتی و آزاد حیثیت اٹ جمع کرفنگ نا چرجوئی جم وجوش اٹ برجاءِ و دا چرجوئی 10 نومبر 2021اسکان برجاسلک۔ ہراڑکن الیکشن کمیشن آف پاکستان تینا شیڈول اٹ الس و سیاسی جماعت آتے آسراتی تننگ و گچین کاری عمل اٹ غٹ تپہ غاتا زیات آن زیات شمولیت و شرکت ءِ پک کننگ کن پندار کاغد آتا جمع کرفنگ نا تاریخءِ 10 نومبر اسکان ودکی کرینے۔ صوبائی الیکشن کمشنر خیبرپختونخوا بذات خود دا ضلع غاتے ٹی گچین کاری امور نا چاروکی ءِ کننگ ءِ۔ وخت اس کہ ڈویژن نا کہول آ ریجنل الیکشن کمشنرز و تعلقدار ضلع غاتا ڈسٹرکٹ الیکشن کمشنرآک ہم دا بابت متحرک ءُ۔ گچین کاری عمل آ سخت نظر تخانن۔ داگچین کاری تے سرسہبی اٹ پورو کننگ کن غٹ المی گام گیج کننگ انگ ءِ۔ داضلع غاتے ٹی پشاور، چارسدہ، نوشہرہ، خیبر، مہمند مردان صوابی بونیر بوجوڑ، ہری پور کوہاٹ کرک، ہنگو بنوں لکی مروت ڈی آئی خان و ٹانک اوار ءُ۔ داڑتون اوار ہی الیکشن کمیشن و تعلقدار گچین کاری عملہ لاہور و خانیوال اٹ مروک آ ضمنی گچین کاری تا پبی تیاری تیٹی لگوک ءِ و داغٹ اہم امور نا الیکشن کمیشن نا کنڈآن پبی مانیٹرنگ کننگ انگ ءِ تانکہ تخوک آ شیڈول نا رداٹ وونٹر لسٹ آتا تیاری تون اوار خیبرپختونخوا نا 19 دسمبر آ مروک آ اولیکو ریسہ نا بلدیاتی گچین کاری و پنجاب اٹی اِراحلقہ NA 133لاہور نا 5 دسمبر و PP 206خانیوال 16 دسمبر اٹ مروک آ ضمنی گچین کاری تے جوانی و شفافیت اتون ایسر اسکان سرکننگ مرے۔ دااہم وخت آ الیکشن کمیشن قوم آن خواست کرینے کہ بڑزکو درج اہم آئینی امور نا سرتننگ اٹ و قومی فائدہ نا خاطر الیکشن کمیشن نا عملہ تون پورو کمک کننگے۔
