کوئٹہ۔ 08 نومبر (اے پی پی) بلوچستان نا پوسکن گچین مروک آ وزیر حاجی محمد خان لہڑی پارینے کہ نصیر آباد آن اِرا صوبائی اسمبلی نا باسک آتا صوبائی وزیر نا وڑاٹ سوغند ہرفنگ علاقہ نا الس نا سرسہبی ءِ، نن نصیر آباد نا الس نا منت وار اُن کہ اوفک بدلی نا دا سفر اٹ ننتون پبی تفیر، ننا اولی کوشست مریک کہ الس نا زیات آن زیات خذمت ءِ کننگ کین، مست آن زیات علاقہ نا شونداری و شونہالی و الس نا راجی آسراتی کن غٹ ممکن گام گیج آتے پک کینہ۔ داخیا ل آتا درشانی ءِ او میڈیا نا نمائندہ غاتون گپ وتران کرسا کرے۔ اوپارے کہ نصیر آباد اٹی زرعی یونیورسٹی آن پد میڈیکل و بی آر سی کالج آتا جوڑ کننگ اہم گام گیج آتیان کم اف نن ہرا الس تون قول کریسن اوفتے پورو کینہ، تنقید و منفی سیاست کروک آتے الس مسترد کرینے، بیرہ تینا سیاسی دوکانداری ءِ نشان تننگ کن بے سوب پروپیگنڈا و غوغا کرسا تینا نابودی ءِ ڈکھنگ ءُ، وزیراعلیٰ میر عبدالقدوس بزنجو نا کماشی ٹی بلوچستان اٹی پین شونداری و شونہالی بریک و الس نا زند انا آب اٹ گچینی اتنگ کن صوبائی حکومت غٹ ممکن وسیلہ غاتے کاریم اٹ اتیک۔ حاجی میر محمد خان لہڑی پارے کہ نن تینا اصولی موقف آ سلیسن، غٹ مشکل و سختی تیان پد ہم ثابت قدم ئسن دا غٹ اللہ تعالیٰ نا کرم و نوازی نا بھرم ءِ۔ اوپارے کہ نن مدام نیک نیتی اٹ تینا حلقہ نا الس نا بے لوث خذمت ءِ کرینن دا منصب الس نا امانت ءِ داٹی ہچ ءُ خیانت اس کپنہ و بے پرخ الس نا ویل آتے ایسر کینہ ہراکہ ننا اولیت آتے ٹی اوار ءِ۔ اوپارے کہ ننا اصل مزل و مسخت ہندادے کہ صوبہ ءِ شونداری نا کنڈآ دننگے، نیزگاری و بے روزگاری نا چٹفنگ کن مخلوق ءِ زیات آن زیات روزگار نا وارخواہی تننگے تانکہ او شونہال ءُ زند اس تیر کننگ کیر۔ اونا پاننگ ئس کہ نصیر آباد نا الس ءِ مایوس کپنہ، اوفتا بنداوی ویل آتے ایسر کننگ کن ہرحد اسکان کانہ۔
