اٹک۔ 05 نومبر (اے پی پی) وزیراعظم عمران خان پارینے کہ ننا مقابلہ مافیا تتون ءِ، کرپشن آ ہچ ءُ سمجھوتہ اس کننگپک، اسہ حکومت اس ہم نیزگارآتے کن داخہ در کاریم کتنے اخس کہ نن کننگ اُن، نیزگار الس آ بھاریم ءِ کم کننگ کن حکومت 450 ارب نا نسخان ءِ تینٹ سگنگ ءِ۔ داخیال آتا درشانی ءِ او جمعہ نادے آ داڑے ضلع اٹک نا پی ٹی آئی سرکڑدہ غاتون گپ وتران کرسا کرے۔ وزیراعلیٰ پنجاب سردار عثمان بزدار، صوبائی وزیر جان جوڑی ڈاکٹر یاسمین راشد، قومی اسمبلی نا باسک میجر(ر) طاہر صادق، پنجاب اسمبلی نا باسک سید یاور بخاری، ملک محمد انور، ملک جمشیدالطاف و پی ٹی آئی اٹک نا پارٹی سرکڑدہ غاک اوڑدہی ٹی اوار ئسر۔ اوڑدہی ٹی وزیراعظم پارے کہ ننا حکومت ہراتم بس تو ہمووخت آ جم زرگزرانی نسخان 20 ارب ڈالر ئس ہرانا سوب آن زرگزرانی حالیت آک مشکل ئسر۔ چونکہ ننا سیبو درآمدآتیا ٹی ءِ ہنداخاطرآن ہراتم پیشن نہادآک ودرہ تو داڑے ہم نہاد آک ودرہ۔ اوپارے کہ نن خواری کرسا اسہ سال اٹی نسخان ءِ 20 ارب آن کم کرسا اسہ ارب ڈالر آ ایسونن۔ ولدا کورونا نا دین مچ آ دنیا ءِ پلویڑاٹی ہلک۔ مچ آ دنیا نا زرگزران نسخان اٹی ہنا و جہانی کہول آ تنکی بس۔ ولے ننا سرسہب پالیسی تا سوب آن دین انا مقابلہ ءِ کرین و داچیلنج تون مون تننگ اٹ سرسہب مسن۔ جہانی کہول آ ننا سرسہب پالیسی تا است بڈی ءِ کننگا۔ وزیراعظم پارے کہ نیزگار الس آ کبینی نا اثرآتا پورو وڑاٹ احساس ارے۔ کبینی ءِ کنٹرول کننگ و نیزگار الس آ بھاریم ءِ کم کننگ نا خاطر حکومت داوخت آ 450 ارب نا نسخان ءِ تینٹ سگنگ ءِ۔ جان جوڑی کارڈ انا مچ آ صوبہ پنجاب اٹی بناءِ کننگ انگ ءِ ہرانا سوب آن نیزگار اُراک آب اٹ درمان نا آسراتی تیان فائدہ ہرفنگ کیرہ۔ احساس سبسڈی پروگرام بنجا و صوبائی حکومت اواری اٹ حقدار اُراتے نت، دال و سی آ 30 درسد سبسڈی فراوان مریک۔ سرسہب پاکستان پروگرام 20 لکھ اُراتے کن سود آن بیدس وام وام فراوان کیک۔ اُراتفنگ، چنکا کاروبار نا بناکننگ، اسکلز ٹریننگ پروگرام و چنکا بزغرآتے کن وام تننگک۔ سرسہب ورناپروگرام مہالو آن مچ آ ملک اٹی ورناتے وام فراوان کننگ ءِ۔ اوپارے کہ ہراُراغا ہنسا احساس سروے کننگا تانکہ اسہ حقدار اس ہم پروگرام آ سلپ۔ اسہ حکومت اس ہم نیزگارآتے کن داخہ کاریم کتنے۔ ہرکہول آ نم داغٹ پروگرام تا فائدہ ءِ تینا تینا علاقہ غاتے ٹی غریب آتسکان سرکبو، ننا مقابلہ مافیاتتون ءِ۔ کرپشن آ ہچ ءُ سمجھوتہ اس کننگپک۔ اوہندی کہول آ سرکڑدہ غاتے پارت کرے کہ او متحرک مرسا نیزگار و حقدار بندغ آتا راجی آسراتی کن کاریم آچکار تخر۔
