کوئٹہ۔ 05 نومبر (اے پی پی) بنجائی وزیر ڈٹ بندی و شونداری اسد عمر پارینے کہ وزیراعظم عمران خان نا وژن ءِ کہ ریاست نا غٹ آن پدسلوک علاقہ غاتے اولیت تننگے، بلوچستان شونداری نا رُمب اٹ پدی سلیسونے، بلوچستان تدوک آ دور تیٹی حق آن محروم مسنے، وزیراعلیٰ بلوچستان نا مثبت سوچءِ الس نا گچینی کن بنجاو بلوچستان اواری اٹ پبی وڑاٹ کاریم کیرہ۔ نُت، بورہ، دال و کنوئی آ تیل آ سبسڈی تننگ اُن۔ جہانی منڈی ٹی تیل انا نہاد آتے ٹی 83 درسد ودکی وخت اس کہ پاکستان اٹ تیل انا نہاد آتے ٹی بیرہ 13 درسد ودکی مسنے، جہانی منڈی ٹی نہاد آتے ٹی ودکی مس، جہانی منڈی آ ننا کنٹرول اف ، کوشست کننگ انگ ءِ کہ پٹرول آ خراج ءِ کم آن کم تخن۔ داہیت ءِ او جمعہ نادے آ وزیراعلیٰ سیکرٹریٹ اٹی وزیراعلیٰ بلوچستان میر عبدالقدوس بزنجوتون اوار پریس کانفرنس آن تران کرساپارے۔ بنجائی وزیر ڈٹ بندی و شونداری اسد عمر پارے کہ وزیراعلیٰ تون اوڑدہی ٹی صوبہ نا شونداری و بلوچستان اٹی خصوصی پیکج نا جاچ ءِ ہلنگا، سویلی بلوچستان خصوصی پیکج اٹ ہراڑے کمتی ئس اونا گچینی آ ہم جاچ ءِ ہلنگا۔ اسدعمر پارے کہ وزیراعلیٰ بلوچستان تون اواری اٹ شونداری ناکاریم ءِ برجاتخنہ، وزیراعلیٰ تون جان جوڑی کارڈ انا بارواٹ ہم ہیت وگپ مسنے۔ اوپارے کہ ریلیف پیکج بلوچستان نا الس اسکان سرمریک، ویکسی نیشن نا بارواٹ وزیراعلیٰ تون سرجمی اٹ ہیت مسنے، وزیراعلیٰ قدوس بزنجو تون اورای اٹ شونداری کاریم تے کینہ، پٹرول مصنوعات نا نہاد آتے ٹی ودکی آ ہیت کرسا بنجائی وزیر ڈٹ بندی و شونداری اسد عمر پارے کہ جہانی منڈی ٹی نہاد آتے ٹی ودکی مس، جہانی منڈی آ ننا کنٹرول اف، کوشست کننگ انگ ءِ کہ پٹرول آ خراج ءِ کم آن کم تخن۔ بلوچستان نا شونداری نا بابت وزیراعظم عمران خان خصوصی است خواہی ہلنگ ءِ مستین بلوچستان ءِ اونا روا حق تننگتو احساس روشن ریلیف پروگرام و جان جوڑی کارڈ بلوچستان آن بناءِ کننگ انگ ءِ ویکسی نیشن عمل ءِ ترند کننگ نا بابت وزیراعلیٰ بلوچستان و چیف سیکرٹری بلوچستان تون ہیت وگپ کننگانے۔ بنجائی وزیر ڈٹ بندی و شونداری اسدعمر پارے کہ پٹرولیم مصنوعات بہاکروک آ ملک آک داہُپسہ کہ ہموڑے نیزگار آک زیات ءُ یاکم۔ بلوچستان نا سیمی علاقہ غاتیان اوغانستان و ایران نا بارڈراسکان سڑک آتا جھال اس تالان کننگ انگ ءِ توانائی گیس و دیر انا ڈٹ سویلی بلوچستان پیکج نا بشخ اسے ءُ۔ آئی ٹی سیکٹر نا بشخ ءِ شون تننگک ۔ داوخت آ وزیراعلیٰ بلوچستان میر عبدالقدوس بزنجو پارے کہ اومیت کینہ کہ بنجائی وزیر اسد عمر تون اوار ایلو بنجائی وزیر آک ہم بلوچستان نا دورہ ءِ کیرہ۔ اوپارے کہ منت واراُن کہ بنجابلوچستان اٹی شونداری نا کاریم تتون تفنگ ءِ ، مہالو پاریسن کہ اگہ بنجا تفپک تو نن ہچ ءُ کننگ کپنہ۔ وزیراعلیٰ میر عبدالقدوس بزنجو پارے کہ سویلی بلوچستان پیکج بھاز جوان ءُ گام اسے، بنجانا کنڈآن سویلی پیکج وڑانا پین پیکج ہم بلوچستان ءِ درکار ءِ اومیت کینہ کہ آخبت ہم وزیراعظم بلوچستان نا گچینی کن تفک۔ وزیراعلیٰ بلوچستان ناپاننگ ئس کہ بلوچستان نا مخلوق پاکستان تون مہرومریبت کیک، ایلو صوبہ غاتیان زیات بلوچستان نا الس پاکستان تون مہرومریبت کیک، اوپارے کہ بنجانا کمک آن بیدس بلوچستان شون ہلنگ کپک، وزیراعظم عمران خان تون بلوچستان نا مخلوق خاص مہرومریبت کیک بلوچستان نا ڈویژنل ہیڈکوارٹرزاٹی وزیراعظم عمران خان کن السی مچی اس اڈتننگک ۔ ہرنائی زمی جمب اٹی ریلیف کاریم تا بابت کمکاری آ بنجائی حکومت نا منت واراُن۔
