کوئٹہ۔ 05 نومبر (اے پی پی) بنجائی وزیر ڈٹ بندی اسد عمر پارینے کہ بلوچستان اٹی برجا شونداری ڈٹ آتا تخوک آ مد اٹی پوروی ءِ پک کننگے انتئے کہ شاہراہ و سڑک آتا تفنگ آن بلوچستان نا مخلوق ءِ ہن و براٹی آسانی اتون اوار اوار کشاری اجناس تے منڈی تسکان وخت آ سرکننگ اٹ آسانی مریک، شونداری پیکج نا خاص مسخت صوبہ ٹی روزگار نا بھلو وارخواہی اس فراوان کننگ و مخلوق نا زند ءِ آب اٹ کننگ ءِ، داخیال آتا درشانی ءِ او جمعہ نادے آ سول سیکرٹریٹ کوئٹہ ٹی سویلی بلوچستان نا شونداری ڈٹ آتا بابت بڑزکو کہولی دیوان آن تران کرسا کرے ، دیوان اٹی بنجائی وزیر دفاعی پیداوار زبیدہ جلال، چیف سیکرٹری بلوچستان مطہر نیاز رانا، بلوچستان عوامی پارٹی نا مرکزی قائم مقام صدر بلوچستان اسمبلی نا باسک میر ظہور احمد بلیدی، ایڈیشنل چیف سیکرٹری ڈٹ بندی، شونداری حافظ عبدالباسط، ایڈیشنل چیف سیکرٹری داخلہ و قبائلی امور ارشد مجید تون اوار غٹ تعلقدار سیکرٹری و ایلوفک ساڑی ئسر۔ داوخت آ بلوچستان اٹی شونداری ڈٹ آتے ٹی پیش رفت نا جاچ ءِ ہلنگا وخت اس کہ چیف سیکرٹری بلوچستان مطہر نیاز رانا بشخ ہلوک آتے ڈٹ آتا بابت سرجم حوال تس، دیوان اٹی مواصلات ، ایریگیشن ، جان جوڑی، تعلیم، ڈیجیٹل کنیکٹیویٹی و ایلو بشخ آتے ٹی برجاشونداری ڈٹ آتا بارواٹ حوال تننگا وخت اس کہ توپک، سولرکور، شادی کور، گربا، شینزک ، سوکھاڈیم نا بابت ہم حوال تننگا، چیف سیکرٹری بلوچستان مطہر نیاز رانا سویلی بلوچستان کن ایل پی جی نا فراوانی، پاک۔چائنا ٹیکنیکل اینڈ ووکیشنل انسٹیٹیوٹ گوادر، سیف سٹی پروجیکٹ گوادر و تربت نا ڈٹ آتیا کاریم نا رفتار آن بشخ ہلوک آتے معلومدار کرے۔ بنجائی وزیر ڈٹ بندی اسد عمر پارے کہ شونداری ڈٹ آتا پوروی آن علاقہ ٹی شونہالی بریک و مخلوق نا زند انا آب ہم گچین مریک۔ داوخت آ بنجائی وزیر اسد عمر ءِ تعلقدار کمامدارآک بلوچستان اٹی شونداری ڈٹ آتے ٹی ٹرانسپورٹ و بنداوی پنجر نا تفنگ، ساف دیر انا فراوانی و گچین کاریم اٹ اتنگ، کشت وکشار، لائیو اسٹاک ، آئی ٹی، توانائی، صنعت وواپار، افرادی قوت، تعلیم و ایلو شونداری ڈٹ آتیا ہم سرجم حوال تسر۔
