اسلام آباد۔ 05 نومبر (اے پی پی) ترجمان سلاہکار خزانہ مزمل اسلم پارینے کہ حکومت پٹرولیم مصنوعات آ سیلز خراج ءِ 17 درسد آن کم کرسا 1.43 درسد کرینے، لیوی نا مد اٹی 35 روپئی فی لیٹر ہم ہلانے، ایلو دروشم اٹ پٹرول 180 روپئی فی لیٹرمسکہ۔ پٹرولیم مصنوعات نا کچ اٹی ودکی نا وضاحت ءِ کرسا جمعہ نادے آ تینا ٹویٹ اٹی اوپارے کہ حکومت پٹرولیم مصنوعات آ سیلز خراج بیرہ 1.43 درسد دوئی کیک۔ اوپارے کہ اگہ سیلز خراج 17 درسد وصول کننگاکہ تو نہاد 160 آن ہم زیات مسکہ۔ اوپارے کہ پین اگہ 30روپئی لیوی نا مد اٹی وصول کننگاکہ تو پٹرول 180 روپئی فی لیٹر مسکہ ولے دامد اٹی حکومت تینا 35 روپئی فی لیٹر ہم ہلانے۔ اوپارے کہ اینو پٹرولیم مصنوعات نا نہاد آتا ودکی نا بابت داسوج بش مسنے کہ انت دا ودکی ٹی حکومت نا کنڈآن خراج نا کچ اٹی ودکی مسنے کہ آخا تو دانا ورندی دادے کہ 145 روپئی نا نہاد اٹی حکومت نا خراج نا کچ 16 اکتوبر نا کہول آن ہم کم ءِ۔ اوپارے کہ داسوب آن حکومت نا خراج کٹیا ءِ بھلو جھٹکہ اس لگانے۔
