کراچی۔ 05 نومبر (اے پی پی) وزیر مملکت حوالکاری و شینکاری فرخ حبیب پارینے کہ پیپلزپارٹی الس ءِ مافیاتا رحم و کرم آ ہلانے، سندھ حکومت وزیراعظم کفالت احساس پروگرام اٹ اوار متنے، ہرجاگہ غا اونا نالائخی پاش ءِ۔ جمعہ نادے آ میڈیا تون گپ وتران کرسا اوپارے کہ سندھ انا حکمرانک نیزگار بندغ آتا زند ءِ ژند کرینو۔ وزیر مملکت پارے کہ ہرجاگہ غا اوفتا نالائخی نظر بریک۔ اوپارے کہ سندھ حکومت وزیراعظم کفالت احساس پروگرام اٹ اوار متو، اگہ ننا پروگرام آن ویل اس ارے تو نیزگار بندغ کن سندھ حکومت پروگرام اس اتے برے۔ وزیر مملکت پارے کہ جان جوڑی کارڈ انا باندات اٹی ہم سندھ حکومت اعتراض کیک، بنجاسندھ حکومت ءِ مسہ سال اٹی دہ ءُ نہہ ارب روپئی تسنے۔ اوپارے کہ داپیسہ غاک ہراڑے خڑچ مسر، سندھ اٹی اسہ جاگہ اس ہم شونداری خننگپک، نیزگارآ بندغ آتا زند ءِ ژند کرینے، اوپارے کہ داپیسہ غاک ہم کرپشن نا گواچی مسنو۔ فرخ حبیب پارے کہ سندھ اٹی لاقانودیت نا رواج ءِ ، ناظم جوکھیو نا کسفنگ نا ایف آئی آر ءِ ہم پی ٹی آئی نا باسک آک کرفیر۔ وزیر مملکت پارے کہ اقوام متحدہ نا رداٹ دنیا ٹی کبینی نا پنجا سالہ ریکارڈ پِنانے۔ اوپارے کہ پٹرولیم مصنوعات نا نہاد آک جہانی کہول آ ودنگ ءُ، نن پٹرولیم لیوی ءِ ودفتنون، پٹرولیم مصنوعات آ سیلز خراج ءِ کم کرینن۔ وزیر مملکت پارے کہ وزیراعظم عمران خان نا کوشست ءِ کہ جہانی کبینی نا اثر پاکستانی الس آ کم آن کم مرے۔
