اسلام آباد۔ 05 نومبر (اے پی پی) بنجائی وزیر مذہبی امور ڈاکٹر پیر نورالحق قادری جمعہ نادے آ اسلام آباد اٹی عراقی سفیر حامد عباس لفتہ تون اوڑدہی کرے ہراٹی شیخ عبدالقادر جیلانی نا عرس انا وخت آ ویزہ غاتا جاری کننگ و زائر آتا آسراتی آ سرجم گپ وتران کننگا۔ وزارت نا ترجمان نا رداٹ بنجائی وزیر مذہبی امور عراقی سفیر آن یانزدہ می شریف نا وخت آ کم از کم 5 ہزار ویزہ غاتا جاری کننگ نا سفارش کرینے۔ بنجائی وزیر مذہبی امور نا پاننگ ئس کہ داوخت آ عاشورہ و اربعین آنبار یانزدہ می شریف نا وخت آ پاکستانی زائر آتا آسراتی ءِ پک کننگے ۔ عراقی سفیر پارے کہ پاکستانی زائر آتے گچین آسراتی فراوان کننگ نا درشانی ءِ کینہ۔ اوبنجائی وزیر مذہبی امور ءِ یانزدہ می شریف نا وخت آ پاکستانی زائر آتا ویزہ غاتا جاری کننگ و آسراتی کن عراقی وزارت داخلہ و خارجہ امورتون رابطہ نا باوری ہم کرفے۔ اوڑدہی ٹی عراقی سفیر تون ویزہ قونصلر و سفارت خانہ نا ایلو آفیسر آک ہم ساڑی ئسر۔ وزیر مذہبی امور پارے کہ چیئرمین پی آئی اے تون کراچی و لاہور آن بغداد کن براہ راست جہاز آتے کن ہیت مسنے۔ یانزدہ می شریف کن کراچی و لاہور آن خصوصی جہاز چلیفنگ آہم ہیت مسنے۔ چیئرمین پی آئی اے پاکستانی زائر آتے سفری آسراتی فراوان کننگ کن پورو کمکاری نا باور کرفینے۔
