وکیل آک جمہوریت، انسانی حق و آئین نا رکھوک آک ءُ، بارایسوسی ایشن نا سیاست بایدے آجو مرے، چوہدری فواد حسین

اسلام آباد۔ 05 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ وکیل آک جمہوریت، انسانی حق و آئین نا رکھوک آک ءُ، کانود نا حکمرانی و آئین نا بالادستی ٹی وکیل آتا روشنا کڑد تاریخ نا بشخ اسے، بارایسوسی ایشن نا سیاست بایدےآجومرے، حکومت و سیاسی جماعت آتا داٹی ہچ ءُ نیام تمنگ اس مف، بروک آ دور ڈیجیٹل نا ءِ، لیگل سسٹم نا سوگوی کن ریفارمز المی ءِ۔ داخیال آتا درشانی ءِ او سپریم کورٹ بار ایسوسی ایشن نا پوسکن گچین مروک آ عہدیدار آتا شرف اٹ اڈ ہلوک آ دود آن تران کرسا کرے۔ بنجائی وزیر حوالکاری پارے کہ ملکی فائدہ بارایسوسی ایشن تون اوار نن غٹ اکن مقدم ءِ، حکومت بار ایسوسی ایشن نا راجی آسراتی کن کوشست و سنبرینگوک ءِ۔ چوہدری فواد حسین پارے کہ نن ہرکہول آ وکیل آتون سلوک اُن، آئین و کانود نا سربلندی کن وکیل آتا خذمت ستاکڑزک۔ اوبارایسوسی ایشن آ زور شاغا کہ او پدتموک مقدمہ غاتے زوت سرتننگ نا بابت تینا کڑد ءِ ادا کے۔ اوپارے کہ بارایسوسی ایشن نا اسہ ہندن ءُ باڈی اس مرے ہرا سپریم کورٹ و ہائی کورٹ نا جج آتا فیصلہ غاتا موازنہ ءِ کے۔ بنجائی وزیر حوالکاری پارے کہ وکلابرادری نا ویل آتیان معلومدار اُن، وکیل آتا ویل آتا ایسری ننا حکومت نا اولیت ءِ۔ بنجائی وزیر حوالکاری سپریم کورٹ بار ایسوسی ایشن نا پوسکن گچین مروک آ عہدیدار آتے مبارکبادی تس۔ دود اٹی سپریم کورٹ بارایسوسی ایشن نا پوسکن گچین مروک آ صدر چوہدری محمد احسن بھون، نائب صدر(پنجاب) خاور اکرام بھٹی، سیکرٹری وسیم ممتاز ملک، چوہدری ریاست علی گوندل ایڈیشنل سیکرٹری ، سینیٹر علی ظفر، پاکستان بار کونسل نا عہدیدار طاہر نصراللہ وڑائچ ، حفیظ الرحمان چوہدری، مسکوہی سیکرٹریز سپریم کورٹ بار ایسوسی ایشن ، رانا شہزاد صفدر حسین تارڑ، ایڈیشنل اٹارنی جنرل عامر رحمان وڑائچ، نائب صدر (سندھ) عزیز احمد خان، ایگزیکٹیو کمیٹی نا باسک (سندھ) جان علی جونیجو، ذوالفقار حیدر شاہ، ایگزیکٹیو کمیٹی نا باسک (پنجاب) رانا اخترعلی ، چوہدری طارق جاوید و اوورسیز پاکستانیز فورم نا چیئرمین محمد ساجد تارڑ ئسک ساڑی ئسر۔