لاہور۔ 05 نومبر (اے پی پی) لاہور نا احتساب عدالت مسلم لیگ ن نا صدر شہباز شریف ، حمزہ شہباز تون اوار خاہوت نا برخلاف منی لانڈرنگ ریفرنس نا سماعت شہباز شریف نا وکیل نا ساڑی مفننگ نا سوب آن بیدس کارروائی آن 12 نومبر اسکان پدبٹے وخت اس کہ بروک آسماعت آ دوبہ دار آتون اوار نیب استغاثہ نا گواہ ءِ دُوارہ بٹنگا۔ احتساب عدالت نمبر اِرٹ نا جج نسیم احمد ورک منی لانڈرنگ ریفرنس آ سماعت کرے۔ جمعہ نادے آ سماعت آ شہباز شریف و اونا مار حمزہ شہباز عدالت اٹ پیش مسر و تینا حاضری ءِ خلفیر۔ سماعت اٹی عدالت ءِ پاننگاکہ شہباز شریف نا وکیل امجد پرویز ڈینگی دین نا گواچی ءِ ہنداخاطرآن پیش مننگ کپک ہنداخاطرآن خواست ءِ کہ سماعوت ءِ پدبٹنگے ہراڑآ عدالت کارروائی آن بیدس سماعت ءِ پدبٹسا بروک آ سماعت آ دوبہ دار آتون اوار نیب انا گواہ ءِ بیان ریکارڈ کرفنگ کن دُوارہ بٹنگا۔ منی لانڈرنگ کیس اٹ شہباز شریف ، سلمان شہباز، حمزہ شہباز، رابعہ شہباز، نصرت شہباز، نثار احمد، شاہد رفیق، یاسر مشتاق ، محمد مشتاق ، آفتا ب محمود، محمد عثمان، طاہر نقوی ، قاسم قیوم، فاضل داد عباسی و علی احمد ءِ پندار کننگانے۔ شہباز شریف تون اوار ایلوفتا برخلاف چار دوبہ دار شاہد رفیق، یاسر مشتاق ، محمد مشتاق و آفتاب محمود وعدہ معاف گواہ جوڑ مسنو۔
