اسلام آباد۔ 04 نومبر (اے پی پی) وزیراعظم عمران خان پارینے کہ خواجہ نبی کریم صلی اللہ علیہ و آلہ وسلم مچ آ انسانیت کن مچ آن مچ رحمت اسے، خواجہ نبی آخرالزمان صلی اللہ علیہ و آلہ وسلم نا رغاموک آ کسرآ عمل کننگ اٹ سرسہبی ءِ، رحمت اللعالمین اتھارٹی نا جوڑ کننگ آن اسلاموفوبیا تون اوار مسلم امہ ءِ مون تروک ساڑی آ چیلنج آتون مون تننگ اٹ کمک رسینگک۔ داخیال آتا درشانی ءِ او پنچ شنبے نادے آ رحمت اللعالمین صلی اللہ علیہ و آلہ وسلم نا جوڑ کننگ نا بابت مسلم ملک آتا سفیر آتون اوڑدہی ٹی کرے۔ اوڑدہی ٹی وزیراعظم عمران خان سفیر آتے رحمت اللعالمین اتھارٹی نا وژن و گرج و مسخت آتا بارواٹ معلومدار کرے۔ وزیراعظم عمران خان پارے کہ خواجہ نبی کریم صلی اللہ علیہ و آلہ وسلم مچ آ انسانیت کن مچ آن مچ رحمت اسے۔ خواجہ صلی اللہ علیہ و آلہ وسلم اسلام نا آفاقی کلہو ءِ مچ آ دنیا اسکان سرکرے۔ اوپارے کہ عدل و انصاف، کانود نا حکمرانی، الس نا راجی آسراتی و علم انا دوئی کننگ آ خاص چکار ریاست مدینہ نا بنداوی اصول ئس۔ اوپارے کہ حقی شونداری و راجی آسراتی نا دوئی کننگ کن خواجہ نبی کریم صلی اللہ علیہ و آلہ وسلم نا رغاموک آ فہم و عملی زند اٹ دافتا نفاذ المی ءِ۔ وزیراعظم پارے کہ رحمت اللعالمین اتھارٹی نا جوڑ کننگ نا مسخت اجتماعی پٹ وپول نا کمک اٹ ورناتے اسوہ حسنہ صلی اللہ علیہ و آلہ وسلم نا غٹ پہلو تیان روشناس کرفنگ، سوشل و ڈیجیٹل میڈیا نا گیشتراثرآتا مون اٹ بروک اسلامی تشخص، قدر و دودوربیدگ نا رکھ اکن المی کمک فراوان کننگ ءِ۔ اوپارے کہ رحمت اللعالمین اتھارٹی مچ آ دنیا ٹی اسلامی اسکالر آتون رابطہ کیک، اوفتے تون مسلمان ورناتے مون تروک ساڑی آ ویل آتیا گپ وتران کننگک۔ و داتھارٹی نا جوڑ مننگ آن پوسکن آ چیلنج خاص وڑاٹ اسلاموفوبیا نا بابت سوگو، منطقی و عملی ردعمل تننگ اٹ کمک رسینگک۔ وزیراعظم اسلام نا اصول و حقی رغاموک آتا کمک اٹ مسلم ورناتا کڑد سازی کن اسکول آتے ٹی اخلاقیات نا تعلیم تننگ نا گرج آ زورشاغا۔ اوورناچین نا شخصیت سازی و زند انا وڑآ اثرانداز مروک آ پرنٹ ،ڈیجیٹل و الیکٹرانک میڈیا نا اہمیت ءِ ہم مون آ تخا۔ وزیراعظم مسلم ملک آتا سفیر آتے سلہ خلک کہ او داچرجوئی ٹی تینا تعمیری خیال و سلاہ تے ہم پیش کیر۔ اودااومیت نا درشانی ءِ کرے کہ دامسخت کن نئے بیرہ حکومتی کہول آ بلکن مسلم ملک آتا دانشور و علم اتون وابستہ چاہندار آتا نیام اٹ ہم گچین شریداری اس عمل اٹ اتنگ مرے۔ سیشن اٹی ساڑی سفیر آک وزیراعظم عمران خان نا کنڈآن رحمت اللعالمین اتھارٹی نا جوڑ کننگ و وزیراعظم عمران خان نا کوشست آتا ستاءِ کریر۔ اووزیراعظم عمران خان نا کنڈآن ہرجہانی فورم آ مسلم امہ ءِ مون تروک ویل آتے تالان کننگ و اوفتا توار ءِ بڑز کننگ نا ہم ستاءِ کریر و داچرجوئی ٹی تینا ہرممکن کمکاری نا ہم باورکرفیر۔
