بیجنگ۔ 04 نومبر(اے پی پی) چین اٹی پاکستان نا سفیر معین الحق ووہان نا ورکنگ کمیٹی نا سیکرٹری و میونسپل سٹینڈنگ کمیٹی نا باسک لیوزچنگ اتون اوڑدہی کرے و پاکستان و ووہان نا نیام اٹ صنعتی و ٹیکنالوجی نا بشخ آتے ٹی کمکاری آ گپ وتران کرے۔ ووہان نا پوسکن آ توانائی و سمارٹ نیٹ ورک انا ڈیمونسٹریشن زون اٹ مروک آ میٹنگ اٹی ورکنگ کمیٹی نا سیکرٹری و میونسپل سٹینڈنگ کمیٹی نا باسک لیوز چنگ پاکستانی سفیر ءِ بائیو ٹیکنالوجی، سیمی کنڈکٹرز و پوسکن آ توانائی و سمارٹ نیٹ ورک نا بشخ اٹی ووہان شار انا بے پناہ شونداری نا لائخی نا بارواٹ معلومدار کرے۔ او دا خصوصی ڈیمونسٹریشن زون اٹ ہڑتوم آ ملک آتا آٹوموبائل کمپنی تا نیام اٹ کمکاری نا سلہ خلک۔ اوپارے کہ ووہان نا الس نا پاکستان تون سنگتی نا خاص ءُ رشتہ اس جوڑ ءِ و او چندی بشخ آتے ٹی اسیجائی کمکاری ءِ ودفنگ خوارہ۔ داوخت آ پاکستان نا سفیر معین الحق پارے کہ اونا پدریسہ کوشست آتیان پاکستان و ووہان نا نیام اٹ پوسکن آ بشخ آتے ٹی کمکاری ترندی اٹ ودنگ ءِ۔ اوپارے کہ توانائی آن چلینگوک آ پوسکن آ گاڈیک ہڑتوم آ ملک آتا نیام اٹ کمکاری نا اسہ ہم ءُ بشخ اسے ءُ انتئے کہ پاکستان اٹی بجلی آن چلینگوک آ گاڈی تا خواست اٹی ودکی مننگ ءِ، اوچینی الیکٹرک وہیکل مینو فیکچرنگ کمپنی تے پاکستانی مارکیٹ اٹ زرکاری نا سلہ خلک ۔ پاکستانی سفیر کورونا دین انا برخلاف جہد آ ووہان نا الس ءِ خراج تحسین پیش کرے و دین اٹی پاکستانی طالب علم آتا خیال ءِ تخنگ آ ووہان نااحکومت نا منت واری ءِ ہرفے۔ داکان مست پاکستانی سفیر معین الحق ءِ ووہان اٹ ڈیمونسٹریشن زون توانائی آن چلینگوک آ پوسکن آ گاڈی تا بابت سرجم حوال تننگا داکان بیدس اودے ہندی وڑاٹ تیار کروک مصنوعی ذہانت آ مبنی بیدس ڈریور بجلی آن چلینگوک آ بس انا دورہ ءِ ہم کرفنگا۔
