اسلام آباد۔ 09 اپریل (اے پی پی) پاکستانی معیشت سال 2030 اسکان دنیا نا 20 می بھلا معیشت نا درجہ ئِ دوئی کیک وپاکستان نا معیشت اٹی شونداری نا بھلو وارخواہی اس ارے۔ برطانیہ نا پارلیمان نا باسک رحمان چشتی تینا اسہ بیان اسے ٹی پارینے کہ پاکستان اٹی گیشتر کاروباری وارخواہی دستیاب ئِ ہرافتیان فائدہ ہرفسا قومی معیشت ئِ دنیا نا بھلامعیشت آتیٹی اوار کرفنگ مریک۔ اوپارے کہ پاکستان نا جہانی کہول آ مثبت تشخص ئِ تالان کننگ نا گرج ئِ انتئے کہ پاکستان اٹی دُن ئُ ہچ ئُ گڑاس اف ہرانا جہانی کہول آ پروپیگنڈا کننگک۔ اوپارے کہ سی پیک نا رداٹ برطانوی زرکار آتے کن زرکاری نا بھلو وارخواہی اس ارے و برطانیہ نا زرکارآک اوفتیان فائدہ ہرفنگ کن ڈٹ بندی کننگ ئُ۔ اوپارے کہ برطانیہ پاکستان نا خذمت ، مصنوعات ، بینکاری و سیکورٹی تون اوار سیل و سوات وغیرہ نا بشخ آتیٹی زرکاری کیک ہراڑآن ہڑتوم آ ملک آتا ہڑتوم آ کنڈآتا کمکاری و اقتصادی رابطہ غاتیٹی پین ودکی مریک۔
