اسلام آباد۔ 04 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ حکومت سازگار کاروباری پالیسی تا کمک اٹ زرکارآتے ہرممکن آسراتی فراوان کننگ ءِ، پاکستان اسہ رکھوک ءُ ملک اسے ہراڑے ملکی و درملکی زرکار و کاروبار ءِ رکھ دوئی ءِ، مسکوہی دور اٹی ڈی انڈسٹرلائزیشن مسکہ، پاکستان تحریک انصاف نا حکومت اقتدار اٹی بننگ تون ملک اٹی ڈی انڈسٹرلائزیشن ءِ توننگ کن گام گیج کرے، ننے یخین ءِ کہ صنعت آک شون ہلیرہ تو ملک مون آ کاہک، وزیراعظم عمران خان نا وژن نا رداٹ حکومت ملک اٹی صنعتی انقلاب کن نمان گام گیج کننگ ءِ، وزیراعظم قوم آن تران اٹی کورونا دین آن پد دنیا ءِ مون تروک زرگزرانی حالیت آتا سرجمی اٹ ذکر ءِ کرے۔ داخیال آتا درشانی ءِ او انٹرپرینیور آرگنائزیشن نا ڈل اتون اوڑدہی ٹی گپ وتران کرسا کرے۔ بنجائی وزیر حوالکاری پارے کہ ملکی زرگزرانی شونداری ٹی کاروباری ادارہ غاتا اہم ءُ کڑد اسے، کاروباری ادارہ غاک بھلو کچ اسے ٹی ملازمت تننگ تون اوار اوار ملک انا جی ڈی پی ٹی نمان بشخ ہلیرہ، پاکستان تحریک انصاف نا حکومت ملک اٹی صنعتی سرجزآتا مون آ دننگ آ پبی چکار تس، ہنداسوب ءِ کہ اینو پاکستان اسٹاک ایکسچینج اٹی زرکاری ودانے، ملک اٹی کاریم کروک آ کمپنی تا کٹیا ٹی ہم ریکارڈ ودکی مسنے، صنعتی و کشاری بشخ اٹی انقلابی گام گیج آتا سوب آن مخلوق نا کٹیاٹی 37 درسد ودکی مس، 1100 ارب روپئی رورل اکانومی آن کشاری بشخ اٹ منتقل مس، اینو ننابڑزغرآک شونہال ءُ۔ اوپارے کہ ملک اٹی صنعتی کشاری سرجزآتے ٹی ودکی نا سوب گاڈی، موٹرسائیکل و ٹیکٹر آتا بہاٹی ریکارڈ ودکی مسنے۔ بنجائی وزیر حوالکاری پارے کہ نن تنخواہ دار تپہ ءِ مون تروک ویل آتیان معلومدار اُن، حکومت دا رداٹ گام گیج کننگ ءِ، کٹیا کروک کمپنیک ہم تینا ورکرآتا تنخواہ تیٹی ودکی کیر۔ داوخت آ انٹرپرینیور آرگنائزیشن نا ڈل حکومت نا کنڈآن صنعت و کاروبار تا شونداری کن چست کروک آ گام گیج آتا ستاءِ کرے۔ ڈل اٹی عاقب چوہدری (رائس ورلڈ)، طارق محمد(اوٹو پاکستان پرائیویٹ لمیٹڈ)، اشعر خان(کوم ٹیل)، عمران غفور(ستارہ پیروکسائیڈ لمیٹڈ)، جاوید مصدق(اربن سول)، خرم گلزار (ویلیو سٹاک اینڈ کموڈیٹیز پرائیویٹ لمیٹڈ)، محسن خواجہ(محمود گروپ)، شاہجہان ملک(گارڈ ایگریکلچرریسرچ اینڈ سروسز پرائیویٹ لمیٹڈ)، عمر اشرف(سپرایشیاموٹرز پرائیویٹ لمیٹڈ)، تنویر احمد(ایفل انڈسٹریز لمیٹڈ)، قاسم چوہدری(مرکنٹائل انٹرپرائزز(پرائیویٹ) ، عمر ورک (حراملز لمیٹڈ)ئسک اوار ئسر۔
