وزیراعلیٰ بلوچستان میر عبدالقدوس بزنجو نا دیوالی نا وخت آ ہندو برادری ءِ مبارکباد

کوئٹہ۔ 04 نومبر (اے پی پی) وزیراعلیٰ بلوچستان میر عبدالقدوس بزنجو دیوالی نا وخت آ ہندوبرادری ءِ مبارکبادی ترسا پارے کہ ہندو برادری بھلو وخت اسے آن صوبہ ٹی آباد ءُ و تینا مسلمان ایلم تتون رواداری، ایلمی و یکجہتی نا فضاء ٹی رہینگ انگ ءُ۔ اوپارے کہ اقلیتی برادری ءِ پورو مذہبی آجوئی و بریبر نا حق دوئی ءِ، اقلیت آک آجوئی اتون تینا مذہبی تہوار ءِ جم و جوش اٹ اڈایترہ۔ اوپارے کہ ننا صوبہ ٹی آباد اقلیتی برادری صوبہ نا زیبا ءُ بشخ اسے ءُ، اقلیت آتے ملازمت آتے ٹی خاص ءُ کوٹہ اس فراوان کننگانے تانکہ غٹ زند انا بشخ آتے ٹی اوفتا پبی نمائندگی مرے۔ وزیراعلیٰ پارے کہ صوبائی اسمبلی ٹی ہم اقلیت آتے کن نشست جتا کننگانے تانکہ او کانود سازی نا عمل اٹ ہم پبی بشخ ہلنگ کیر۔ وزیراعلیٰ صوبہ وملک اٹی آباد غٹ ہندوبرادری کن نیک است خواہی نا درشانی ءِ ہم کرے۔