اسلام آباد۔ 04 نومبر (اے پی پی) وزیراعظم نا خصوصی کمکار سیاسی ابلاغ ڈاکٹرشہباز گل پارینے کہ زرگزران ءِ ڈبیفوک آک اینو زرگزران آ مگرمچھ نا خڑینک شولنگ ءُ، کانود شکن ننے کانود ءِ ہیل تننگ ءِ بند کیر، کورونا ٹی دنیا نا زرگزرانک بھس مسر ولے پاکستانی زرگزران سوگو مس۔ پنچ شنبے نادے آ شہباز شریف نا بیان آ ردعمل اٹ اوپارے کہ زرگزران ءِ ڈبیفوک آک اینو زرگزران آ مگرمچھ نا خڑینک شولنگ ءُ۔ الس چاہک کہ کبین ایل این جی نا پد اٹ ہراسٹ نا معاہدہ غاک ءُ۔ اوپارے کہ مچ آ دنیاٹی بے لگام کبینی آن پد ہم پاکستان اٹ کنوئی آ گڑاک داسہ ہم اڑزآن ءُ۔ کانود شکن ننے کانود ءِ ہیل تننگ ءِ بند کیر۔ ڈاکٹر شہباز گل پارے کہ کورونا ٹی دنیا نا زرگزرانک بھس مسر ولے پاکستانی زرگزران سوگو مس۔ ملکی زرگزران و تشخص ءِ لتاڑوک آک اینو ملک و جمہوریت کن درواٹ ہوغنگ ءُ۔ اوپارے کہ نابود آک 5 سال اٹی برآمد آتے ٹی صفر درسد ودکی کریر۔ مستین اٹ زرگزران ءِ برآمد ودفنگ نا جاگہ غا آئی ایم ایف نا وام تیا چلیفسا کننگا۔ نابود لیگ ڈالر ءِ مصنوعی وڑاٹ سوگو کننگ کن فارن ایکسچینج ریزروءِ خورک کرے۔ عمران خان بند کارخانہ غاتے چلیفے، ایکسپورٹس ءِ ودفے۔
