اسلام آباد۔ 03 نومبر (اے پی پی) وزیراعظم عمران خان پارینے کہ ننے تینا راج اٹ گچین بدلی اتنگ کن 1400 سال مست ننا خواجہ نبی صلی اللہ علیہ و آلہ وسلم نا شین تروک شاندار روایت آتیا عمل کروئی مریک۔ چارشنبے نادے آ تینا کماشی ٹی رحمت اللعالمین صلی اللہ علیہ و آلہ وسلم اتھارٹی نا دیوان اٹی گپ وتران کرسا وزیراعظم پارے کہ ننے پوسکن آ میڈیا خاص وڑاٹ سوشل میڈیا نا کمک اٹ تینا ورناتے اجنبی دودوربیدگ نا غیر اخلاقی جلہو آتیان بچفنگ کن دمدستی گام گیج آتا گرج ءِ۔ اوپارے کہ رحمت اللعالمین صلی اللہ علیہ و آلہ وسلم اتھارٹی نا جوڑ کننگ نا مسخت ننا ورناچین اٹی اخلاقی قدر ءِ بیدار کننگ ءِ ہرادے انٹرنیٹ نا دادور اٹی ہروڑنا غیراخلاقی مواد اسکان آن لائن رسینگ دوئی ءِ۔وزیراعظم تعلقدار کمامدارآتے پارت کرے کہ او پٹ وپول نا کمک اٹ داہیت انا تعین ءِ کیر کہ ہراوڑ ننا ٹیک ساوی ورناتا کڑد سازی ءِ گچین وڑٹ پک کننگ مریک۔ اوسیرت طیبہ نا شاندار رغاموک آتے مون آ تخسا اسکول، کالج، و یونیورسٹی نا کہول آ طالب علم آتے تعلیم تننگ کن نصاب اٹ بدلی درستی راستی کرفنگ آ زور شاغا۔
