اسلام آباد۔ 03 نومبر (اے پی پی) صدر مملکت ڈاکٹر عارف علوی دہشت گردی نا چندی واقعہ غاتے ٹی شہید مروک آ پاک فوج انا ورنا تا پدسلوک آ خاہوت آتے چارشنبے نادے آ ٹیل فون کرے و پدسلوک آتون ہڑزخواہی کرے۔ ایوان صدر نا پریس ونگ آن جاری بیان نا رداٹ صدر مملکت قطبی وزیرستان ، باجوڑ و ضلع کرم اٹی شہید مروک آ پاک فوج انا ورناتا خاہوت آتون ٹیل فون آ رابطہ کرسا اوفتے تون ہڑزخواہی کرے۔ او20 اکتوبر آ باجوڑ اٹی دھماکہ ٹی شہید مروک آ لانس نائیک مدثر، سپاہی جمشید خان و سپاہی صمد خان نا خاہوت تون است ہسونی نا درشانی ءِ کرے۔ صدر مملکت 26 اکتوبر آ ضلع کرم اٹی سم کاری ٹی شہید مروک آ سپاہی اسد و سپاہی آصف نا وارث آتون ہم گپ وتران کرے۔ صدر ڈاکٹر عارف علوی 26 اکتوبر آ قطبی وزیرستان اٹی دھماکہ ٹی شہید مروک آ سپاہی رمضان خٹک و سپاہی روحیل حسین نا خاہوت تون ہم ٹیل فون آ گپ وتران کرے۔ صدر مملکت وطن نا خاطر شہید آتا خذمت و عظیم قربانی تیا شہید و اوفتا خاہوت آتے خراج عقیدت پیش کرے۔ صدر پدسلوک آ خاہوت آتون ہڑزخواہی کرسا شہید ورناتا درجہ غاتا بڑزی کن دعا کرے۔
