راولپنڈی۔ 03 نومبر (اے پی پی) خاتون اول بیگم ثمینہ علوی پارینے کہ ملکی زرگزران اٹ زالبول آک ہم اہم ءُ کڑد اس ادا کننگ اٹی ءُ، حکومت کاروباری برادری نا شونداری کن پبی گام گیج کننگ ءِ، زالبول آتے تینا جان جوڑی آ سنجیدگی اٹ چکارتخوئی مریک، وخت آ تشخیص آن سینہ نا کینسر آن بچنگ مریک، پوریاگر برادری سینہ نا کینسر آن بچنگ نا قومی مہم اٹ زیات آن زیات بشخ ہلے ننا زالبول راجی و معاشرتی دباؤ ولاعلمی نا سوب آن تینا جان جوڑ ءِ گوجالرہ۔ داخیال آتا درشانی ءِ خاتون اول بیگم ثمینہ علوی چارشنبے نادے آ راولپنڈی چیمبر آف کامرس نا کنڈآن سینہ نا کینسر آ قومی آگاہی سیمینار آن تران کرساکرے۔ اوپارے کہ ایشیائی ملک آتے ٹی سینہ نا کینسر نا کچ غٹ آن زیات ءِ و ہرسینزدہ منٹ اٹ اسہ زالبول اٹی دا مرض انا تشخیص مریک۔ اوٹیچنگ ہسپتال آتے ٹی میموگرام مشین خلنگ نا سلاہ ءِ پیش کرے وپارے کہ داڑآن بریسٹ سکریننگ و تشخیص نا بارواٹ آسراتی دوئی مننگ کیک۔ بیگم ثمینہ علوی پارے کہ ملک انا پوریاگر برادری حکومت نا کوشست آتے ٹی دوءِ سبک کے۔ حکومت نا کنڈآن زالبول آتے مالی وڑاٹ واکدار کننگ کن بینک آتا کمک اٹ وام ہم تننگ انگ ءِ ولے معلومداری و آگاہی مفننگ نا سوب آن زالبول آک محروم سلرہ۔ خصوصی بندغ آتے کن ہم چندی سکیمک اریر۔ چیمبرآف کامرس و پوریاگر برادری خصوصی بندغ آتے واکدار کننگ کن تینا کڑد ءِ ادا کیر۔ سیمینار نا وخت آ صدر چیمبر ندیم رؤف، گروپ لیڈر سہیل الطاف، سینئر نائب صدر عاصم ملک، نائب صدر طلعت اعوان، ایگزیکٹو ممبر، چیئرپرسن عروج ثاقب، زالبول باسک و طالب علم آتا اسہ بھلو کچ اس ہم ساڑی ئسر۔ داکان مست صدر چیمبر ندیم رؤف راولپنڈی چیمبرنا کنڈآن زالبول آتے واکدار کننگ کن اہم گام گیج آتے مون آ تخا۔ اوپارے کہ زالبول انٹرپرینیورآتے زرگزران نا مرکزی دنگ اٹ اوار کننگ کن کیہی اہم گام گیج کننگانے۔ پاکستان نا اولیکو آ ل پاکستان ویمن چیمبرز پریذیڈنٹ اڈتننگ نا کریڈٹ راولپنڈی چیمبر ءِ کاہک ہراڑے مچ آ پاکستان نا چیمبرز آف کامرس نا زالبول صدر آک داکانفرنس اٹی بشخ ہلکر۔ داکان بیدس زالبول آتے مون تروک ویل آتے تالان کننگ کن چیمبر نا احاطہ ٹی انٹرپرینیور شپ آ تربیتی سیشن تون اوار اوار چندی ایونٹ آتا ہم بست وبند ءِ کننگ ءِ۔ داٹی ایف بی آر رجسٹریشن، این ٹی این، سیکورٹیز اینڈ ایکسچینج کمیشن آف پاکستان۔ سٹیٹ بینک فنانسنگ ، ڈیجیٹل مارکیٹنگ، Webocپین پین اوار ءُ۔ اوپارے کہ دا یقینا بھاز گڑتی نا ہیت اسے کہ پاکستان اٹی ہر ہشت می زالبول ءِ سینہ نا کینسر اٹ اختہ مننگ نا خطرہ ءِ۔ دُن تو اکتوبر آ مچ آ ملک اٹی سینہ نا کینسر آن آگاہی نا تُو انا وڑاٹ اڈتننگک، ولے ای حکومت و ایلو ادارہ غاتیا زور شاغیوہ کہ آگاہی نا کلہو ءِ مچ آ سال پدریسہ تالان کننگ نا گرج ءِ۔ گروپ لیڈر سہیل الطاف پارے کہ زالبول آتے کاروبار نا کنڈآ اتنگ کن گام گیج کننگ انگ ءِ تانکہ او ہم ملکی زرگزران نا شونداری ٹی تینا کڑد ءِ ادا کننگ کیر۔ سیمینار اٹی فوجی فاؤنڈیشن نا پنی آ انکالوجسٹ ڈاکٹر فوزیہ بریسٹ کینسر نا آگہی نا بابت سرجم پریذنٹیشن ہم تس۔
