اسلام آباد۔ 03 نومبر (اے پی پی) وزیرخارجہ مخدوم شاہ محمود قریشی پارینے کہ ملکی زرگزران ءِ گچین و سوگو کننگ کن کاروباری ورنابندغ آتا کڑد بھاز اہمیت تخک۔ داہیت ءِ او اقتصادی سفارت کاری گام و پاکستان نا اقتصادی اولیت ایجنڈانا رداٹ ، انٹرپرینیور آرگنائزیشن، لاہور چیپٹر تون اوار، کاروباری ورنابندغ آتا ڈل اتون گپ وتران کرسا پارے ہرافک چارشنبے نادے آ اوڑتون وزارت خارجہ ٹی اوڑدہی کریر۔ پاکستان نا منہ سرکڑدہ ورناسی ای او ز آ تالان ڈل انا کماشی ءِ محسن خواجہ کریکہ۔ انٹرپرینیور آرگنائزیشن نا لاہور چیپٹر، پنی آ کاروباری پڑک آتا 70 باسک آتیا تالان ءِ ہرالاہور، فیصل آباد، سیالکوٹ وملتان اٹی پاکستان نا صنعت آتا اسہ بھلو بشخ اسے نا نمائندگی ءِ کیک ۔ ’’ایف ایم کنیکٹ‘‘ گام انا رداٹ مروک آ دا اوڑدہی ٹی وزیرخارجہ شاہ محمود قریشی ورناکاروباری بندغ آتے پاکستان نا ’’اقتصادی سفارتکاری وژن‘‘ نا خدوخال آن معلومدار کرے و وزارت خارجہ نا کنڈآن اقتصادی سفارت کاری نا بابت داتم اسکان چست کروک آ اہم گام گیج آتے مون آ تخا۔ وزیرخارجہ پاکستان اٹ واپار و زرکاری نا مون آ دننگ کن وزیراعظم عمران خان نا وژن آن ہم ڈل ءِ معلومدار کرے۔ وزیرخارجہ پارے کہ ملکی زرگزران ءِ گچین و سوگو کننگ کن ورناکاروباری خواجہ غاتا کڑد بھاز اہمیت تخک۔ ڈل انا باسک آک اقتصادی سفارت کاری کن چست کروک آ گام گیج آتا ستاءِ کرسا وزیرخارجہ نا منتواری ءِ ہرفیر۔
