اسلام آباد۔ 03 نومبر (اے پی پی) قائم مقام چیئرمین سینیٹ مرزامحمد آفریدی پارینے کہ پاکستان یورپین یونین تون رابطہ کاری ءِ ستاکڑزوک سرپند کیک، داڑے زرکاری کن بھلو وارخواہی اس ارے۔ داخیال آتا درشانی ءِ او یورپین یونین نا 10 باسکی ڈل اتون گپ وتران کرسا کرے ہرافک چارشنبے نادے آ پارلیمنٹ ہاؤس اٹی اوڑتون اوڑدہی کریر۔ اوڑدہی ٹی پاکستان و یورپین یونین نا نیام اٹ ادارہ جاتی کمکاری، ڈل آتا ہن و بر اٹی ترندی اتنگ، واپاری و اقتصادی رابطہ غاتے پین مون آ دننگ نا بابت گپ وتران کننگا۔ اویورپین یونین نا ڈل ءِ پارلیمنٹ ہاؤس آ بننگ آ بخیراٹ پارے۔ قائم مقام چیئرمین سینیٹ پارے کہ پاکستان یورپین یونین تون رابطہ کاری ءِ ستاکڑزوک سرپند کیک، واپاری و اقتصادی کمکاری ءِ پین ودفنگ کن گام گیج آتا گرج ءِ۔ اوپارے کہ پاکستان اٹ زرکاری کن بھلو وارخواہی اس ارے۔ ڈیہہ نا ترندی اٹ بدل مروک حالیت آتے کن پاکستان امن و شونداری ءِ اہم تکک، راجی و اقتصادی شونداری کن امن ءِ مون آ دننگ المی ءِ۔
