بیجنگ۔ 03 نومبر(اے پی پی) پاکستان و چین نا نیام اٹ تعلیم، سائنس ، ٹیکنالوجی ، تکنیکی و کسبی تربیت و السی کہول آ عملی کمکاری ءِ مون آ دننگ کن صوبائی کہول آ تعلقداری تے برجاتخنگ نا معاہدہ غا دستخط کننگا۔ دابابت ووہان اٹ اڈ ہلوک آ دود اٹی چین اٹی پاکستان نا سفیر معین الحق و صوبہ ہوبی نا گورنر وانگ زونگ لنگ معاہدہ غا دستخط کریر۔ دود اٹی صوبہ ہوبی نا نائب گورنر ہاؤہیشان و بڑزکو انگا سینئر عہدیدار آک بشخ ہلکر۔ دود اٹی وزیراعلیٰ سندھ سید مراد علی شاہ و کراچی ٹی چین نا قونصل جنرل نا ویڈیو کلہو آتے چلیفنگا۔ داوخت آ صوبہ ہوبی نا گورنر وانگ زونگ لنگ پارے کہ چین و پاکستان ہرمشکل و خوشی نا ساہت اٹ اسہ ایلو نا سٹریٹجک کوآپریٹیو پارٹنر ءُ و ہڑتوم آ ملک آتا نیام اٹ دوستانہ تعلقداری تلارآنبار سوگو ءِ ہرا ننا سرکڑدہ غاتا پبی مخ تفی و امنائی سلاہ نا ڈیک ءِ۔ اوپارے کہ تدوک آ 70 سال اٹی ہڑتوم آ ملک آک ہڑتوم آ کنڈآتا تعلقداری تے سوگو و کڑمب کننگ کن اواری اٹ کاریم کریر و اسہ ایلو تون سوگوی اٹ سلیسر۔ اوصوبائی کہول آ ترعلقداری تا جوڑ کننگ آ پت انا درشانی ءِ کرسا پارے کہ دا معاہدہ تعلیم، سائنس و ٹیکنالوجی، تکنیکی و کسبی تربیت و مخلوق نا نیام اٹ ہن و بر نا بشخ آتے ٹی عملی کمکاری نا سوب مریک۔ پاکستان نا سفیر معین الحق ووہان نا دورہ ٹی گچین بست وبند و مہمانداری آ صوبہ ہوبی نا گورنر نا منت واری ءِ ہرفے۔ اوکورونا دین انا برخلاف جنگ اٹ غٹ آن مست سرسہبی دوئی کننگ کن صوبہ ہوبی و ووہان نا الس نا حوصلہ و قوت ءِ خراج تحسین پیش کرسا پارے کہ پاکستانی الس نا است آتے ٹی ہوبی خاص ءُ ہند اس دوئی کرینے۔ پاکستانی سفیر معین الحق پارے کہ چین اٹی خوانوک ہزار آ پاکستانی طالب علم ہڑتوم آ ملک آتا نیام اٹ دودوربیدگی پول انا حیثیت تخرہ۔ پاکستانی سفیر گورنر نا چین پاکستان سنگتی نا مخ تفی نا ستاءِ کرسا پارے کہ فرینڈ شپ سکوائر نا بنا و صوبائی کہول آ تعلقداری قائم کننگ نا معاہدہ غا دستخط آن ہڑتوم آ ملک آتا نیام اٹ چندی بشخ آتے ٹی کمکاری نا اسہ پوسکن ءُ باب اس بناکیک۔ اوچین پاکستان سفارتی تعلقداری نا 70 می سال دے انا چرجوئی ٹی دریائے یانگزے نا پول آ شاندار آتش بازی و چندی دود آتا اڈتننگ آ گورنر نا منت واری ءِ ہرفے۔
