بیجنگ۔ 03 نومبر (اے پی پی) چین و پاکستان پٹ وپولی پلیٹ فارم و مصنوعی ذہانت نا سینٹر نا جوڑ کننگ کن مفاہمت نا اسہ یات داشت اسے آ دستخط کرینو ہرانا رداٹ پاکستان اٹ زالبول آتے ٹی کینسر نا چندی وڑتا تشخیص و ’’مصنوعی ذہانت‘‘ (اے آئی) نا نظام نا کمک اٹ سکریننگ و تشخیص ءِ کننگ مریک۔ مفاہمت نا یات داشت آ دستخط تدوک آ دے چین و پاکستان نا سفارتی تعلقداری نا 70 می سال دے انا خوشی نا چرجوئی ٹی چین نا صوبہ ہوبی نا دارالحکومت ووہان اٹی چائنا پاکستان فرینڈ شپ سکوائر نا بنانا وخت آ اڈ ہلوک آ دود اٹی کننگا۔ دادستخط ووہان نا لینڈنگ انٹیلی جنس کمپنی لمیٹڈ نا چیف ایگزیکٹیو آفیسر ڈاکٹر سون ژیاورونگ و پاکستان نا لائف ری ہیلتھ ٹیکنالوجی نا چیف ایگزیکٹیو آفیسر (سی ای او) ڈاکٹر احمد وقاص ئسک کریر۔ دایات داشت نا رداٹ زالبول آتے ٹی کینسر نا چندی وڑتا تشخیص وسکریننگ کن مصنوعی ذہانت سینٹر و پٹ وپولی پلیٹ فارم اس لانچ کننگک۔ دود اٹی چین اٹی پاکستان نا سفیر معین الحق، صوبہ ہوبی نا نائب گورنر، ووہان شار انا نائب میئر، صوبہ ہوبی نا اہم عہدیدار آک بشخ ہلکر۔ داوخت آ پاکستان نا سفیر معین الحق پارے کہ دا ٹیکنالوجی آن زالبول آتا بابت کینسر کون آ سروائیکل کینسر نا ناجوڑ آتا دمدستی و گچین درمان اٹ کمک رسینگک۔ پاکستان نا لائف ری ہیلتھ ٹیکنالوجی نا سی ای او ڈاکٹر احمد وقاص پاکستان نا سرکاری خبررساں ایجنسی ءِ پارے کہ پاکستان اٹ زالبول آتا بابت کینسر کون آ سروائیکل کینسر نا بھاز زیات تالانی ءِ و پاکستان ءِ دا بشخ اٹی پوسکن انگا ٹیکنالوجی تا کمتی مون تروک ءِ۔ داپروگرام نا کمک اٹ پاکستان دا ٹیکنالوجی آن پبی فائدہ ہرفنگ کیک۔ اوپارے کہ ہڑتوم آ ملک آتا نیام اٹ برادرانہ تعلقداری نا رداٹ دامفاہمت نا یات داشت آن پاکستان اٹ خاص وڑاٹ کینسر نا بابت ٹیکنالوجی نا نظام ءِ اپ گریڈ کننگ، زالبول آتا بابت کینسر نا دمدستی تشخیص و ناجوڑ آتا گچین درمان اٹ ڈاکٹر آتے کمک رسینگک۔ داوخت آ ووہان نا لینڈنگ انٹیلی جنس کمپنی لمیٹڈ نا سی ای او ڈاکٹر سون ژیاورونگ تینا تران اٹی پارے کہ اوبھاز خوش ءِ کہ کمکاری نا کمک اٹ ہڑتوم آ ملک آتا الس زیات آن زیات رابطہ و خاص وڑاٹ ڈاکٹر آتا نیام اٹ رابطہ قائم کننگ کیک۔
