اسلام آباد۔ 02 نومبر (اے پی پی) صدر مملکت ڈاکٹر عارف علوی پارینے کہ قومک لائخ آ بندغ آتیان جوڑ مریرہ ، پاکستان اٹی بڑزکو تعلیم آ چکار ودنگ ءِ، ملک ءِ تعلیم و ہائیر ایجوکیشن اٹ مو ن آ دینہ، راج خوانوک آ زالبول آتے اوفتا اہلیت نا رداٹ کاریم کننگ نا موقع ایتے، تعلیم نا پڑاٹ شون ہلسا پاکستان بھاز ترندی اٹ شون ہلوک ءُ ملک اس جوڑ مریک۔ صدر مملکت داخیال آتا درشانی ءِ سے شنبے نادے آ داڑے کنونشن سینٹراٹی قائد اعظم یونیورسٹی اسلام آباد نا 2021 نا کانووکیشن آن تران کرسا کرے۔ کانووکیشن اٹی یونیورسٹی نا چانسلر ڈاکٹر عارف علوی، وائس چانسلر پروفیسر ڈاکٹر محمد علی، بنجائی پارلیمانی سیکرٹری تعلیم وجیہہ اکرم و یونیورسٹی نا چندی بشخ آتا سروک آتیان بیدس مار و مسن تا اسہ بھلو کچ اسے ہم ساڑی ئسر۔ صدر مملکت پارے کہ یونیورسٹی نا 9 می کانووکیشن اٹ بشخ ہلنگ آ خوش مسونٹ، طالب علم آتے مبارکبادی ایتیوہ کہ او زند انا اسہ ریسہ سے عبور کرینو۔ تعلیمی پڑاٹ قائد اعظم یونیورسٹی نا نمان سرسہبی نا ستاءِ کرسا اوپارے کہ قائداعظم یونیورسٹی پاکستان نا ایلو تعلیمی ادارہ غاتا مقابلہ ٹی رینکنگ نا اعتبار اٹ نمبرون ءِ۔ ڈاکٹر عارف علوی پارے کہ دانمان ہند خواری اٹ بریک، داہیت انا بھلواہمیت اسے کہ تعلیم ہراوڑاٹ تننگے۔ اوپارے کہ پاکستان اٹ بڑزکو تعیم آ چکار ودنگ ءِ، داقوم اسہ خاص ءُ مسخت و مزل اسے تون مون آ بننگ ءِ، جمہوریت نا بنداو آ پاکستان جوڑ مس و ریاست مدینہ نا وڑآ چلینگوئی ءِ، ملک ءِ تعلیم و ہائیر ایجوکیشن اٹ مون آ دینہ۔ اوپارے کہ پاکستان اخلاقیات نا بنداو آ دنیا نا لیڈر مریک، برینڈ پاکستان نا بنداو دیانتداری مریک، دنیا ٹی ’’فیک نیوز‘‘ آتا یلغار ءِ، طالب علم آک تعلیم نا دوئی کننگ آن پد لمہ و باوہ و راج انا خذمت ءِ کیر۔ صدر مملکت پارے کہ پاکستان اٹی بیرہ 9آن 10 طالب علم ہائیر ایجوکیشن اٹ کارہ وخت اس کہ ڈیہہ نا ایلو ملک آتے ٹی دا کچ زیات ءِ۔ صدر پارے کہ قومک قدرتی وسیلہ غاتے اٹ آخا لائخ آ بندغ آتیان جوڑ مریرہ۔ مونجوداڑو ہزار آ سال مست آباد مس ولے نمے اوڑے ہچ ءُ سلہہ اس ملپک، جرمنی و جاپان ارٹ میکو جہانی جنگ آن پد تعلیم نا کمک اٹ شونداری نا مزل ءِ طے کریر، پاکستان اٹ ورناتا کچ زیات ءِ ہرافتیا چکار کرسا اوفتے بڑزکو خوانندہ و کسبکار کننگ مریک، یونیورسٹی نا طالب علم و فیکلٹی ءِ مبارکبادی ترسا صدر مملکت پارے کہ یونیورسٹی نا فارغ مروک آ طالب علم آک تینا کیریئر ءِ جوڑ کننگ تون اوار اوار راج اانا زمواری تے ہم بایدے ہرفر و دامسخت کن ایلوفتیکن کاریم کروئی مریک۔ ڈاکٹر عارف علوی پارے کہ 1970 آن 1990 اسکان نا دہائی تیٹی نن بھلو کچ اسے ٹی ڈاکٹر آتا کھیپ اس تیار کرین ہرا روزگار کن پیشن نا ملک آ ہنار و ہنداوڑ اوفتیان 90 درسد ایلوملک آتیکن وقف مسر۔ اوپارے کہ نن ساڑی آ دور انا خواست آتارداٹ بڑزکو خوانندہ آئی ٹی گریجویٹس تیار کین، اپلیکیبل سائنس نا گریجویٹس نا گرج ءِ، بنجائی وزیر تعلیم شفقت محمود داباندات اٹی پبی کمک و کڑد ادا کننگ ءِ۔ صدر مملکت پارے کہ ہائیر ایجوکیشن کمیشن خصوصی بندغ آتا تعلیم کن ہراگام گیج آتے کرینے او ستاکڑزرہ دارداٹ خاتون اول بیگم ثمینہ علوی ہم پبی کڑد ادا کرینے۔ اوپارے کہ دنیا ٹی منشیات نا کاریم اٹ اتنگ ودنگ ءِ، یونیورسٹی تیٹی ڈرگز بایدے چٹے۔ صدر داہیت آ خوشی نا درشانی ءِ کرے کہ قائد اعظم یونیورسٹی نا کانووکیشن اٹی مسن تے زیات گولڈ میڈل ملانے۔وائس چانسلر پارے کہ دنیا ٹی فیکلٹی نا لحاظ اٹ قائد اعظم یونیورسٹی نا 28 می نمبر ءِ، تدوک آ مسہ سال اٹی یونیورسٹی نا رینکنگ اٹ ودکی مسنے، یونیورسٹی ملک انا اقتصادی و راجی شونداری ٹی ہم اہم کڑد ادا کننگ ءِ، وزیراعظم نا پارت آ یونیورسٹی ٹی سپورٹس سینٹراس ہم جوڑ کینہ وخت اس کہ یونیورسٹی نا غٹ گریجویٹ آتے کن آئی ٹی کورس کرفنگ انگ ءِ وخت اس کہ دنیا نا ایلو یونیورسٹی تتون مفاہمت نا یات داشت آتیا دستخط کرینن۔ اوپارے کہ یونیورسٹی نا سالانہ بجٹ 2.5 ارب روپئی ءِ، پاکستان اٹ رینکنگ نا اعتبار اٹ قائد اعظم یونیورسٹی اولیکو نمبرآٹے وخت اس کہ اودے بجٹ اٹی 39 نمبر آ تخنگانے، یونیورسٹی نا بجٹ ءِ ودفنگ نا گرج ءِ تانکہ خوانفوک آ عمل ءِ پین گچین کننگ مرے۔ داکان مست یونیورسٹی نا چانسلر صدر مملکت ڈاکٹر عارف علوی فیکلٹی باسک آتون اوار کانووکیشن ہال اٹ پترینگا ہراڑے طالب علم و یونیورسٹی نا استاد آک بش مرسا اودے بخیر کریر۔ ڈاکٹر عارف علوی نمان پوزیشن ہلوک آ طالب علم آتے ٹی میڈل بشخا۔
