کوئٹہ۔ 02 نومبر (اے پی پی) بلوچستان نا علاقہ چیف چوک خاران بازار اٹی موٹرسائیکل اٹ تخوک آئی ای ڈی بمب دھماکہ ٹی 11 بندغ ٹھپی مسنو۔ ہندی انتظامیہ نا رداٹ سے شنبے نادے آ خاران اٹی چیف چوک بازار اٹی موٹرسائیکل اٹ تخوک بمب اناگت ترخا ہراٹی 11 شاری ٹھپی مسر، پولیس و سیکورٹی فورس آتے حوال ملنگ تون واقعہ نا جاگہ غا سرمرسا ٹھپی تے دمدستی وڑاٹ ڈی ایچ کیو ہسپتال آ گدریفیر ہراڑے اوفتے طبی امداد تننگ انگ ءِ۔ ٹھپی مروک آتے ٹی عابد ولد میرزا، ثناء اللہ ، فیصل ولد ابراہیم، محمد آصف، حضور بخش ، عبدالمالک ، نذیر احمد، محمد عیسیٰ ، اخلاق احمد، منیر احمد، احمد ولد خدابخش و مزمل اوار ءُ۔ پولیس و سیکورٹی فورس آک علاقہ نا ناکہ بندی ءِ کرسا دوبہ دار آتا پٹنگ نا بناءِ کرینو، دا چرجوئی ٹی مستی جاست وپاست برجاءِ۔
